მადრიდის ატლეტიკოს დამარცხების სახით, ბარსელონა ნამდვილი შეუსრულებელი მისიის წინაშე დგას. შეგახსენებთ, რომ ჩემპიონთა ლიგის პირველ 1/4 ფინალურ შეხვედრაში კატალონიელებმა "როხიბლანკოსთან" შინ 0:2 წააგეს. 1/2 ფინალში გასვლისთვის პრიმერა დივიზიონის ლიდერს სჭირდება მოგება მინიმუმ 3-ბურთიანი სხვაობით.
როგორც აღვნიშნეთ, ეს არის შეუსრულებელი მისია, იმის გათვალისწინებით, რომ დიეგო სიმეონეს გუნდს ჩემპიონთა ლიგის პლეიოფში სახლში არასდროს წაუგია. 11 მოგება, 6 ფრე და სულ რაღაც 5 გაშვებული ბურთი, ასეთია არგენტინელი სპეციალისტის მონაგარი ევროპის მთავარი საკლუბო ტურნირის პლეიოფში.
ატლეტიკოს ბოლო მარცხი ჩემპიონთა ლიგის ჯგუფურ ეტაპს შემდეგ თარიღდება 1997 წლის მარტით, ამსტერდამის აიაქსთან (2:3) მეოთხედფინალში. საინტერესოა ისიც, რომ მადრიდელებს არ წაუგიათ ძირითად დროში, 1:1-ის შემდეგ დაინიშნა ექსტრა ტაიმები, რომელშიც "ებრაელებმა" 2:1 მოიგეს.
"ელ ჩოლო" მაშინ იყო 27 წლის და "როხიბლანკოსის" ღირსებას ფეხბურთელის რანგში იცავდა. რაც შეეხება ძირითად დროში მარცხს ჩემპიონთა ლიგის პლეიოფში, მსგავსი რამ მეტროპოლიტანოს მკვიდრთა ისტორიაში აქამდე არ ყოფილა. სწორედ ამიტომაა "ბლაუგრანას" მისია შეუსრულებელი.
