იტალიის სუპერთასის ფორმატი უკვე 3 წელია, რაც შეიცვალა და საუდის არაბეთი არა მხოლოდ ფინალს, არამედ ოთხთა ტურნირს მასპინძლობს. წელს ტიტულისთვის მილანი, ბოლონია, ინტერი და ნაპოლი იბრძოლებენ. მაყურებელს წინ ნაპოლი-მილანისა და ბოლონია-ინტერის დაპირისპირებები ელოდება.
დღეს, პირველი ნახევარფინალური დაპირისპირება გაიმართება, სადაც ერთმანეთს ნაპოლი და მილანი შეხვდებიან. გუნდები ამ მატჩს განსხვავებულ ფორმაში ხვდებიან. ანტონიო კონტეს ბიჭებმა ბოლო ორი მატჩიდან ორივე წააგეს, ხოლო მილანს შედარებით კარგი სვლა აქვს და ყველა ტურნირზე ბოლო ჩატარებული 16 მატჩიდან მხოლოდ ერთი აქვს წაგებული. ბოლოს ეს გუნდები ერთმანეთს მიმდინარე სეზონის სტარტზე შეხვდნენ, სადაც მილანმა მეტოქეს 2-1 მოუგო და საჩემპიონო განაცხადიც გააკეთა.
ახლა კი რაც შეეხება დანაკლისს, ნაპოლის ამ შეხვედრაში არც მეტი, არც ნაკლები 6 ფეხბურთელი დააკლდება: ოლივეირა, ანგისა, დე ბრუინი, მერეტი, გილმორი და ჟესუსი - ეს ფეხბურთელები ანტონიო კონტეს განკარგულებაში არ იქნებიან. რაც შეეხება მილანის დანაკლისს, დღევანდელ მატჩს გაბია და ხიმენესი გამოტოვებენ.
ნაპოლის სავარაუდო შემადგენლობა: სავიჩი, დი ლორენცო, რაჰმანი, ბონჯორნო, პოლიტანო, მაკტომინეი, ლობოტკა, სპინაცოლა, ნერესი, ჰოილუნი, ელმასი;
მილანის სავარაუდო შემადგენლობა: მენიო, ტომორი, დე ვინტერი, პავლოვიჩი, სალმაკერსი, ფოფანა, მოდრიჩი, რაბიო, ბარტეზაგი, ნკუნკუ, პულისიკი;
დღევანდელი მატჩი თბილისის დროით 23:00 საათზე დაიწყება. რაც შეეხება მეორე ნახევარფინალურ დაპირისპირებას, ბოლონია ფინალის საგზურის მოპოვებას ინტერის წინააღმდეგ შეეცდება. ეს შეხვედრა ხვალ, 19 დეკემბერსაა ჩანიშნული.
რაც შეეხება სუპერთასის ფინალის თარიღს, მატჩი 22 დეკემბერს გაიმართება. შეგახსენებთ, წინა სეზონში იტალიის სუპერთასის ტიტულს მილანი დაეუფლა.
