იუვენტუსი პოგბას გუნდიდან უშვებს — სად გააგრძელებს კარიერას ფრანგი?

საფრანგეთის ეროვნული ნაკრებისა და ტურინის იუვენტუსის ნახევარმცველმა, პოლ პოგბამ საარბიტრაჟო დავა მოიგო და 4 წლიანი დისკვალიფიკაცია 18 თვემდე შეუმცირდა.

შემცირებული დისკვალიფიკაციის მიუხედავად, ტურინულ კლუბს 31 წლის ფრანგი ფეხბურთელის შენარჩუნება არ სურს და მას კონტრაქტს უახლოეს დღეებში ოფიციალურად გაუწყვიტავს.

გავრცელებული ინფორმაციის თანახმად, პოლ პოგბა, დიდი ალბათობით, ევროპასაც დატოვებს და კარიერას MLS-ში გააგრძელებს — ფეხბურთელი მოლაპარაკებებს მაშინვე დაიწყებს, როდესაც თავისუფალი აგენტი გახდება.

შეგახსენებთ, რომ პოლ პოგბა ტურინის იუვენტუსის ღირსებას 2012-16 წლებში იცავდა, შემდეგ მანჩესტერ იუნაიტედში გადავიდა და 2022 წელს კვლავ ბიანკონერიში დაბრუნდა. იუვენტუსის მაისურით ჩატარებულ 190 მატჩში მის ანგარიშზე 34 გოლი და 41 ასისტია.