ტურინის იუვენტუსის მთავარმა მწვრთნელმა, მასიმილიანო ალეგრიმ სერია ა-ს მიმდინარე სეზონის სასკუდეტო ბრძოლა ჩოგბურთელების დაპირისპირებას შეადარა. მან გაავლო პარალელი - მისი გუნდი იანიკ სინერია, მილანის ინტერი კი ნოვაკ ჯოკოვიჩი. შეგახსენებთ, ავსტრალიის ღია პირველობაზე იტალიელმა სერბის 33-მატჩიანი წაუგებელი სერია შეწყვიტა.
"მინდა მივულოცო სინერს, რომელმაც ბრწყინვალე შეხვედრა ჩაატარა. ის უმაღლეს მწვერვალებს დაიპყრობს. იანიკმა დაამარცხა ლეგენდარული ჯოკოვიჩი, რაც ნამდვილად საოცარი მოვლენაა. არის თუ არა მსგავსება მათ შორის ჩატარებულ მატჩსა და სერია ა-ს მიმდინარე სეზონის სასკუდეტო დუელს შორის? პარალელს გავავლებ.
იმის გათვალისწინებით, რომ იუვენტუსი დაკომპლექტებულია ახალგაზრდა ფეხბურთელებით, ჩვენ ვართ სინერი, ინტერი კი ნოვაკი იყოს. იმედია, მათ არ ეწყინებათ", - განაცხადა იტალიელმა. შეგახსენებთ, ტურინელები მილანელებს ამჟამად უსწრებენ ერთი ქულით, მაგრამ "ნერაძურის" ერთი მატჩით ნაკლები აქვს ჩატარებული.
"ბებერი ქალბატონის" უახლოესი მოწინააღმდეგე ემპოლი იქნება. რაც შეეხებათ "გველებს", იტალიის სუპერთასის მოგების შემდეგ, მათი სეზონი ფლორენციის ფიორენტინასთან გასვლითი მატჩით განახლდება. ცნობისთვის, 4 თებერვალს, ანუ მომდევნო ტურში, "ბიანკონერი" სწორედ ჯუზეპე მეაცას სახელობის სტადიონს ესტუმრება.
