ჩემპიონთა ლიგის მიმდინარე სეზონის ფინალი მიუნხენში გაიმართება. აქამდე, აღნიშნულ ქალაქში ჩატარდა ევროპის მთავარი საკლუბო ტურნირის 4 ფინალი და ყველა შემთხვევაში გამარჯვებული ხდებოდა ის კლუბი, რომელსაც ჩემპიონთა ლიგა/ჩემპიონთა თასი იმ მომენტისთვის მოგებული ჯერ არ ჰქონდა.
პირველი მიუნხენური ფინალი გაიმართა 1979 წელს - ნოტინგემ ფორესტმა მალმიო დაამარცხა. დიახ, ეს იყო ინგლისური გუნდის პირველი მთავარი საკლუბო ჯილდო. 1993 წელი: მარსელის ოლიმპიკი უგებს მილანს და ეუფლება თავის პირველს, მაგრამ ჯერჯერობით ბოლო ტიტულს.
შეგახსენებთ იმასაც, რომ "თეთრ-ლურჯების" გუნდი ჯერჯერობით ერთადერთია ლიგა 1-დან, რომელმაც ევროპაში ტრიუმფი შეძლო. ოთხი წლის შემდეგ, ანუ 1997 წელს, დორტმუნდის ბორუსიამ ფინალში მოუგო ტურინის იუვენტუსს, ასევე მიუნხენში. ბოლოს კი ამ დროისთვის უკანასკნელი მიუნხენური ფინალი: ჩელსი - ბაიერნი.
2012 წელს, "რეკორდმაისტერის" დამარცხებით, ლონდონელებმა თავისი პირველი ტიტული გაიფორმეს. რაც შეეხება მიმდინარე სეზონს, ჩემპიონთა ლიგას ამ დროისთვის შემორჩა 4 კლუბი: ბარსელონა, მილანის ინტერი, პარის სენ-ჟერმენი და ლონდონის არსენალი.
აღნიშნული ოთხეულიდან ჩემპიონთა ლიგა მოუგიათ კატალონიელებსა და "ნერაძურის", პსჟ-სთვისა და "მეთოფეებისთვის" კი ეს მომენტი ჯერ არ დამდგარა. "მიუნხენურ განრიგს" თუ გავყვებით, წლევანდელი ტრიუმფატორი პარიზსა და ემირეიტსის ბინადრებს შორის ერთ-ერთი უნდა იყოს.
| სეზონი | ფინალი | ქალაქი |
| 1978/79 | ნოტინგემი 1:0 მალმიო | მიუნხენი |
| 1992/93 | მარსელი 1:0 მილანი | მიუნხენი |
| 1996/97 | დორტმუნდი 3:1 იუვენტუსი | მიუნხენი |
| 2011/12 | ჩელსი 1:1 (პენ. 5:4) ბაიერნი | მიუნხენი |
