საქართველოს საკლათბურთო ნაკრები ევრობასკეტისთვის მზადებას მასპინძელ არენაზე აგრძელებს. კვიპროსში ჩასულმა ქართველმა კალათბურთელებმა სპიროს კიპრიანუს დარბაზში პირველი ვარჯიში გამართა.
ნაკრებთან ერთად ივარჯიშა თორნიკე შენგელიამ. ჩვენი გუნდის კაპიტანს გულის არითმიის გამო შეკრების დატოვება 9 აგვისტოს მოუხდა და ლიეტუვადან ესპანეთში გაემგზავრა, სადაც თავისმა ახალმა კლუბმა ბარსელონამ საფუძვლიანი კვლევა ჩაუტარა და პოზიტიური შედეგების შემდეგ, ნაკრებში დაბრუნების შესაზლებლობა მიეცა. შენგელიამ გუნდთან ერთად სტანდარტულ კომბინაციებში მიიღო მონაწილეობა, თუმცა მეტი დრო ინდივიდუალურ ვარჯიშს დაუთმო, რომელიც ქართველ ფორვარდს კატალონიურმა კლუბმა შეუდგინა.
საქართველოს კალათბურთელთა ნაკრების 13-კაციანი შემადგენლობა:
რატი ანდრონიკაშვილი, კამარ ბოლდუინი, გიორგი ოჩხიკიძე, კახა ჯინჭარაძე, დუდა სანაძე, ალექსანდრე ფევაძე, თორნიკე შენგელია, სანდრო მამუკელაშვილი, ბექა ბურჯანაძე, გიორგი კორსანტია, გოგა ბითაძე, გიორგი შერმადინი და ილია ლონდარიძე.
ევრობასკეტზე საქართველო 12 კალათბურთელით წარდგება, შესაბამისად, 27 აგვისტომდე ალეკსანდარ ჯიკიჩს შემადგენლობის შემცირება ერთი მოთამაშით მოუწევს.
ევრობასკეტი 2025 ოთხ ქვეყანაში – ლატვიაში, ფინეთში, პოლონეთსა და კვიპროსში გაიმართება. აღნიშნულ ქვეყნებში ტურნირის თითო ჯგუფი 6 ნაკრების შემადგენლობით შეიკრიბება და 4 საუკეთესოს გამოავლენს. ჯგუფებიდან ჯამში გასული 16 ნაკრები მეორე ეტაპს პლეი-ოფს ლატვიის დედაქალაქ რიგაში ჩაატარებს, სადაც კონტინენტის ჩემპიონი გამოვლინდება.
საქართველოს ნაკრები კვიპროსში, მასპინძელ ნაკრებთან, იტალიასთან, ბოსნია და ჰერცეგოვინასთან, ესპანეთთან და საბერძნეთთან ერთად იასპარეზებს. ჩვენი გუნდი პირველ მატჩს 28 აგვისტოს, 16:00 საათზე, ესპანეთთან გამართავს.
