კაპელო: "იუვემ ნახევარდაცვაში წააგო, ილდიზი ზეწოლას ვერ გაუმკლავდა"

"ბევრ კითხვას გაეცა პასუხი და ამჯერად დავინახეთ ინტერის უპირატესობა ხარისხსა და ხასიათში. ტიტულისკენ დიდი ნაბიჯია გადადგმული", - ფაბიო კაპელო, მილანის, იუვეს, რომას და მადრიდის რეალის ყოფილი მწვრთნელი და ამჟამად უკვე Sky Sport-ის კომენტატორი.

- სად დომინირებდა ინტერი ყველაზე მეტად?

- ნახევარდაცვაში.

- უფრო კონკრეტულად...

- ინტერი დომინანტი იყო შუახაზში. ჩალჰანოღლუსა და სხვა ნახევარმცველების მაღალმა კლასმა განაპირობა შედეგი. ნერაძურის შემადგენლობა დაბალანსებული და ძალიან ძლიერია. ისინი იბრძვიან ბურთისთვის, აფასებენ სიტუაციას და ხიფათს ქმნიან კარის წინ. ბიანკონერი დიმარკოსგანაც დაზარალდა. ასევე, ინძაგის გუნდში ცვლილებებმაც გაამართლა, რაც ადასტურებს მათი შემადგენლობის სიძლიერეს.

- სიმონე ინძაგის გუნდის წარმატება უბრალოდ სამი ქულაა თუ მეტი?

- ეს 3 ქულაზე ბევრად მეტია. ინტერს აქვს 4-ქულიანი უპირატესობა იუვენტუსთან და ერთი თამაშით ნაკლები. ახლა "შავ-ლურჯებს" შეეძლებათ უფრო მშვიდად თამაში.

- რა არ მუშაობდა იუვენტუსში?

- ვლაჰოვიჩს პირველ ტაიმში უნდა გაეტანა, თუმცა ის სასოწარკვეთილი იყო არასწორი თამაშისა და გაფლანგული შესაძლებლობის გამო.

- სხვა კომპონენტები?

- იუვენტუსში საუკეთესო იყო შესნი, ეს ასევე რაღაცას უნდა ნიშნავდეს...ზოგადად, იუვენტუსის ბურთის კონტროლი ძალიან ნელი იყო.

- ილდიზი, რომელიც სასტარტო თერთმეტეულში კიეზას ამჯობინეს, პირველად გამოჩნდა იტალიურ დერბიში: იტანჯებოდა თუ არა თურქი მარგალიტი ზეწოლისგან?

- დიახ, ვფიქრობ, რომ ეს იგრძნობოდა. მგონია, რომ ილდიზი ის ფეხბურთელია, რომელსაც წინსვლა სჭირდება, მაგრამ ინტერთან მატჩში თავის გამოჩენა მისთვის ისედაც რთული იქნებოდა.

- ალეგრის გუნდს არ წაუგია 23 სექტემბრის შემდეგ: გასულ შაბათს ემპოლისთან ფრესა და ინტერთან სან სიროზე მარცხის შემდეგ, შეიძლება თუ არა ვლაჰოვიჩისა და მისი თანაგუნდელების ჩავარდნაზე საუბარი?

- არა მგონია. ახლა იუვენტუსი უფრო მშვიდად ითამაშებს. მინიმუმ, ჩემპიონთა ლიგაზე გასვლის საკითხში მათ პრობლემა არ შეექმნებათ.

- ალეგრი რომ იყოთ, რას ეტყოდით ფეხბურთელებს, ინტერთან მარცხს წარსულში დატოვებდით?

- ალბათ ვეტყოდი: ბიჭებო, ჩვენ გავაკეთეთ მაქსიმუმი, გავიგეთ ჩვენი შესაძლებლობები და ახლა უნდა დავიხვეწოთ. უნდა გავხდეთ უფრო სწრაფები და ვერტიკალურად თამაში ვისწავლოთ.

- სიმონე ინძაგის ადგილზე რომ იყოთ?

- გუნდს ასე ვეტყოდი: გილოცავთ ბიჭებო, შესანიშნავი თამაში იყო. მეტოქის პატივისცემით ვითამაშეთ, ასე უნდა გავაგრძელოთ.

- იუვენტუსზე გამარჯვება ინტერს ჩემპიონთა ლიგაზეც მისცემს სტიმულს თუ ეს ორი ცალკე თავია?

- დარწმუნებული ვარ, რომ ინტერი ასევე შორს წავა ჩემპიონთა ლიგაზე, რადგან ინძაგის ძლიერი გუნდი ჰყავს, ნახევარდაცვით, რომელიც ევროპაში საუკეთესოთა შორისაა.

- მილანი მხოლოდ 4 ქულით ჩამორჩება მეორეადგილოსან იუვენტუსს: შეუძლია თუ არა პიოლის ალეგრის გადასწრება?

- მე ასე არ ვფიქრობ, მაგრამ ერთი რამ ცხადია: მილანის ახალი მოთამაშეები კარგად არიან შეთამაშებულები და "როსონერი" სწორ გზაზეა.

Filippo Cornacchia © RCS MEDIAGROUP