საქართველოში ავტოსპორტი ყოველწლიურად ვითარდება და სულ უფრო მეტი ადამიანი ინტერესდება. დრიფტის სერიების პარალელურად, სტარტი აიღო დრიფტის ლიგამ, სადაც მონაწილეობას მოყვარული დრიფტერები მიიღებენ.
დრიფტის ლიგის პირველი სეზონის პირველი ეტაპის გამარჯვებულიგიორგი გძელაშვილი გახდა, რომელიც ავტოსპორტში 2022 წლიდან არის ჩართული და აქტიურად იღებს მონაწილეობას შეჯიბრებებში. ჩვენ გიორგის დავუკავშირდით და საინტერესო თემებზე ვისაუბრეთ.
- როდის დაინტერესდი ავტომობილებით და როგორ მოხვდი ავტოსპორტში? მოგვიყევი შენი კარიერის შესახებ
"ავტომობილებით ბავშვობიდან ვიყავი დაინტერესებული, დაახლოებით 4 წლის ასაკიდან უკვე მხოლოდ მანქანებით თამაში მომწონდა. ავტოსპორტში 2022 წლიდან ჩავერთე, კერძოდ დრიფტში. სწორედ ამ დროს შევიძინე საკუთარ ავტომობილი და დავიწყე შეჯიბრებებში მონაწილეობა."
"ჩემი დრიფტში ჩართვა პირველ რიგში მათე როჭიკაშვილის დამსახურებაა, რომელთანაც ვმეგობრობ. პირველად სწორედ მან შეიძინა ავტომობილი დრიფტისთვის და სწორედ მან მიბიძგა მეც მიმეღო მონაწილეობა შეჯიბრებებში."
- დღეს რა ეტაპზე ქართული ავტოსპორტი და რა არის საჭირო მისი კიდე უფრო მეტად განვითარებისთვის?
"2022 წლის შემდეგ, რაც მე ჩავერთე შეჯიბრებებში, ზოგადად ქართული ავტოსპორტი და კონკრეტულად დრიფტი აქტიურად ვითარდება. ვფიქრობ აღნიშნული ტენდენცია შენარჩუნდება, ქართული დრიფტი ყოველწლიურად გააგრძელებს განვითარებას და მაღალ საფეხურებზე ასვლას."
- დრიფტის ლიგის პირველი სეზონის პირველი ეტაპის გამარჯვებული გახდი. როგორ ემზადებოდი შეჯიბრებისთვის და რას ნიშნავს ეს გამარჯვება შენთვის?
"შეჯიბრებისთვის ვერ მოვემზადე, რადგან გზის მონახაზი ორი დღით ადრე მოგვაწოდეს მონაწილეებს და პირდაპირ კვალიფიკაციის დღეს მივედი და მაქსიმუმ 6 გარბენის გავლა მოვასწარით უშუალოდ საკვალიფიკაციო ეტაპის დაწყებამდე. კვალიფიკაციაზე 54 ქულა დამიწერეს და მე-10 ადგილი დავიკავე."
*დრიფტის ლიგა, პირველი ეტაპი
"კვირას კი დიდი ომის შემდეგ რბოლაში პირველ ადგილზე გავედი და ეს ჩემთვის მოულოდნელი იყო, რადგან აქამდე პოდიუმზე არასდროს ავსულვარ. ამ გამარჯვებამ დიდი მუხტი მომცა და შემდეგი შეჯიბრებებისთვის უფრო შემართებული ვარ."
- ზოგადად როგორ ხდება დრიფტის შეჯიბრებისთვის მომზადება? რა ეტაპების გავლა უწევს დრიფტერს უშუალოდ შეჯიბრების დღემდე?
"ერთი შეხედვით დრიფტისთვის მომზადება მარტივი ჩანს — მიხვალ, ივლი და წამოხვალ, მაგრამ ეს ასე არ არის. მანქანის და გზის დატესტვის მომენტში ძალიან ბევრი დეტალი ფუჭდება და ხშირად ღამეების გათენებაც კი გვიწევს შეჯიბრებების წინა დღეებში. მოკლედ ძალიან რთულია დრიფტისთვის მომზადების პროცესი, მაგრამ შემართებას არასდროს ვკარგავთ."
*გიორგი გძელაშვილი
- რას აპირებ მომავალში? რა არის შენი მთავარი მიზანი ავტოსპორტში?
"მინდა, რომ შეძლებისდაგვარად ყველა შეჯიბრებაზე გამოვიდე და პირველ რიგში საკუთარი თავის განვითარებაზე ვფიქრობ. მთავარი მიზანი განვითარება და უფრო მაღალ დონეზე ასვლაა."
- და ბოლოს, რას ეტყოდი მათ, ვინც ავტოსპორტით არის დაინტერესებული?
"ვინც ავტოსპორტით არის დაინტერესებული ვეტყოდი, რომ დრიფტი ყველაზე მაგარია ჩემი გადმოსახედიდან. რაც მთავარია მხოლოდ ავტოდრომზე დაკავდნენ დრიფტით და ქალაქში სწრაფი გადაადგილებისგან თავი შეიკავონ."
2025 წელს დრიფტის ლიგის სულ 5 ეტაპი ჩატარდება. პრიველ ეტაპს რუსთავის საერთაშორისო ავტოდრომმა უკვე უმასპინძლა, ხოლო მეორე ეტაპი 6 ივლისს, ფოთში გაიმართება.
