საქართველოს საკალათბურთო ეროვნული ნაკრების კაპიტანსა და "ვირტუს ბოლონიას" ლიდერს, თორნიკე შენგელიას შესაძლებლობა აქვს იტალიის ჩემპიონატის საუკეთესო მოთამაშე გახდეს. MVP-ის გამოსავლენად legabasket.it-ზე გამოკითხვა მიმდინარეობს. გულშემატკივარს ხმის მიცემა 9-16 მაისს შეუძლია.
33 წლის შენგელია სერია A-ს რეგულარული სეზონის საუკეთესო კალათბურთელის პრეტენდენტთა შორის ზედიზედ მეორედ დასახელდა.
MVP-ის ჯილდოსთვის იტალიის ჩემპიონატიდან 5 კალათბურთელი იბრძვის:
თორნიკე შენგელია (ვირტუს ბოლონია);
მირინო ბილანი (ბრეშა);
ენტონი ლამი (ტრენტო);
ჯეი დი ნოტაე (ტრაპანი);
ჯასტინ რობინსონი (ტრაპანი).
სერია A-ს ოფიციალური გვერდი კანდიდატების შესახებ, შემაჯამებელ ინფორმაციას აქვეყნებს, სადაც აღნიშნულია, რომ თორნიკე შენგელია ქართველი სუპერვარსკვლავია, რომელიც გამუდმებით შრომობს და გუნდს განსაკუთრებით ეხმარება:
"ყოველწლიურად მწვერვალზე მოხვედრის თანმიმდევრულობის, სუპერვარსკვლავის სტატუსის მიუხედავად, შრომისმოყვარეობისა და გაუმჯობესების სურვილის სიმბოლოა. ამ ყველაფერმა 1991 წელს დაბადებული მაღალი დონის კალათბურთელი ზედიზედ მეორედ მიიყვანა საუკეთესო მოთამაშის ჯილდოსთვის ბრძოლაში.
ხანგრძლივი კარიერის განმავლობაში მიღებულმა გამოცდილებამ ქართველს შესაძლებლობა მისცა, იდეალურად მოერგებოდა გუნდის საჭიროებებს. სეზონის განმავლობაში შენგელია თანაბრად იყო ვარსკვლავი სასტარტო ხუთეულში და ჯოკერი სათადარიგოთა სკამიდან შემოსვლისას. ორივე შემთხვევაში უნაკლო აღმოჩნდა და გუნდს სატურნირო ცხრილში პირველი ადგილისთვის ბრძოლაში დაეხმარა.
შენგელია ჩემპიონატში საშუალოდ, 24.8 წუთი თამაშობდა, 14.4 ქულას, 5.7 მოხსნასა და 2.9 შედეგიან გადაცემას აგროვებდა. ქართველის სარგებლიანობის კოეფიციენტი 19.8 შეადგენს."
მიმდინარე გამოკითხვის გამარჯვებულისა და შესაბამისად,MVP-ისვინაობა 21 მაისს გახდება ცნობილი.
