დღეს საქართველოს ეროვნულმა საფეხბურთო ნაკრებმა ჰამბურგში, ევროპის ჩემპიონატზე მეორე მატჩი გამართა და პირველი ქულა მოიპოვა. შეხვედრა ფრედ 1:1 დასრულდა, მატჩის შესახებ, საქართველოს ნაკრების ერთ-ერთმა ლიდერმა, ხვიჩა კვარაცხელიამ ისაუბრა:
„ისე ვგრძნობდი თავს, თითქოს საქართველოში ვთამაშობდი, დიდი მადლობა გულშემატკივარს. რაც შეეხება თამაშს, ახლოს ვიყავით მოგებასთან, მეტოქეს ბევრი მომენტი ჰქონდა, მაგრამ მამარდაშვილმა ძალიან კარგი თამაში აჩვენა, ბევრჯერ გადაგვარჩინა და ამიტომაა ის მსოფლიოში საუკეთესო მეკარე. ჩვენც გვქონდა მომენტები, ბოლოს მოგებაც შეგვეძლო. ზოგადად, ბოლო პერიოდში ჩვენ ვუჩვენეთ, რომ ყველა გუნდთან თამაში შეგვიძლია და ვიდრე შანსი გვაქვს, გავალთ და ბოლომდე ვიბრძოლებთ.
ნაკრებისთვის ყველაფერს ვაკეთებ, მიუხედავად იმისა, რომ ნაკრებში ჩემს პოზიციაზე არ ვთამაშობ, რასაც მავალებენ ვცდილობ ყველაფერი გავაკეთო. ვფიქრობ, მეტი შემიძლია, საკუთარი თავით კმაყოფილი არასდროს ვარ.
თამაშის შემდეგ გასახდელში მწვრთნელმა თქვა, რომ ძალიან განვიცდიდით. ახლოს ვიყავით მოგებასთან. ყველა ფეხბურთელს შეიძლება დაემართოს ის, რაც ახლა მოხდა საბას ლობჟანიძის შემთხვევაში. ყველა ვამხნევებთ საბას არაფერი არ ხდება ისეთი, რაც აქამდე არ უნახავთ, მესის და რონალდუსაც ვერ გაუტანიათ. ვფიქრობ, საბა სხვა შემთხვევაში გამოიყენებს შანსს და საქართველოს ასახელებს.
ჩემი შეცვლა მწვრთნელმა უფრო გადაწყვიტა და მის გადაწყვეტილებას პატივს ვცემ, ყველაფერი კარგადაა.
ჩეხეთი ხელწამოსაკრავი ნაკრები არაა, ჩვენც ვნახეთ, ვფიქრობ, დაცვამ კარგად ითამაშა, კონტრშეტავაზე ჩვენი თამაში ნაყოფიერია და შეგვეძლო ამის ხარჯზე მატჩი მოგვეგო," - განაცხადა ხვიჩა კვარაცხელიამ.
საქართველოს ნაკრები ევროპის ჩემპიონატზე ჯგუფური ეტაპის დასკვნით მატჩს 26 ივნისს, პორტუგალიის წინაარმდეგ გამართავს.
