კონფერენს ლიგა: ასტონ ვილა, ოლიმპიაკოსი, ლილი და ბრიუგე მომდევნო ეტაპზე გავიდნენ

კონფერენს ლიგის 1/8-ფინალური ეტაპი დასრულდა.

ასტონ ვილა - აიაქსი: ვილა პარკზე თავიდან ბოლომდე ემერის გუნდის დომინაცია ვიხილეთ. პირველ ტაიმში ასტონ ვილა წინ ოლი უოტკინსმა გაიყვანა, მეორე ტაიმში კი ბეილიმ გაზარდა სხვაობა ორ ბურთამდე. მატჩის ბოლოსკენ, ბირმინგემულმა გუნდმა კიდევ ორი გოლის გატანა მოახერხა. ჯერ დურანმა გამოიჩინა თავი, შემდეგ კი დიაბიმ. საბოლოო ანგარიში 4:0 დაფიქსირდა და ასტონ ვილა მომდევნო ეტაპზე გავიდა.

ლილი - შტურმი გრაცი: პირველი მატჩის შემდეგ ეს დაპირისპირება ფორმალურ ხასიათს ატარებდა. პირველ ტაიმში გუნდებმა ერთმანეთს თითო-თითო გოლი გაუტანეს. ძირითად შემადგენლობაში იყო ოთარ კიტეიშვილიც, რომელიც მეორე ტაიმის სტარტზე შეცვალეს. საბოლოოდ ლილმა შემდეგ ეტაპზე გასვლა მოახერხა.

მაკაბი თელ-ავივი - ოლიმპიაკოსი: გვიანი სესიის გამორჩეული მატჩი. პირველი შეხვედრის შემდეგ მაკაბის 3-ბურთიანი უპირატესობა ჰქონდა (4:1), თუმცა ოლიმპიაკოსმა ეს უპირატესობა პირველ ტაიმში გააქრო. ბერძნებმა 3 უპასუხო გოლის გატანა მოახერხეს. მეორე ტაიმი მაკაბიმ კარგად დაიწყო და მალე გოლის გატანაც შეძლო, თუმცა ოლიმპიაკოსმა მალევე უპასუხა მეოთხე გატანილი გოლით. შემდეგ იყო დამატებითი ტაიმები, სადაც ოლიმპიაკოსმა მეტოქეს კიდევ ორი გოლი გაუტანა. საბოლოოდ 1:6 და სტუმრები მომდევნო ეტაპზე გადიან.

ბრიუგე - მიოლდე: პირველი წაგებული მატჩის შემდეგ, ბელგიაში სულ სხვანაირი ბრიუგე ვიხილეთ. სკოვ ოლსენის დუბლის და სკორასის გოლის წყალობით, ბელგიელები შემდეგ ეტაპზე გავიდნენ.