ჩემპიონშიპის მე-18 ტურში უოტფორდი სტუმრად ბირმინგემ სიტისთან ანგარიშით 1:2 დამარცხდა. სტუმრების მხრიდან მოედანზე 59-ე წუთზე გამოჩნდა გიორგი ჩაკვეტაძე, რომელმაც ტრავმის მოშუშების შემდეგ, "ყვითლების" რიგებში მე-2 შეხვედრა ჩაატარა. თამაშის დასრულების შემდეგ, ქართველ ფლეიმეიქერზე ისაუბრა ჰერტფორდშირელთა დამრიგებელმა, ხავი გრასიამ.
"როგორც ვხედავთ, ჩაკვეტაძის პროგრესი აშკარა არის. მას სჭირდება ვარჯიში, კონკურენცია და მეტი სათამაშო დრო, იმისთვის, რომ საკუთარი თავის საუკეთესო ვერსია აჩვენოს. გიორგის განვითარებით კმაყოფილი ვარ და ეჭვი არ მეპარება, რომ მომდევნო შეხვედრებშიც დაგვეხმარება."
შეგახსენებთ, რომ ჩემპიონშიპში ჩატარებული 18 ტურის შემდეგ, ვიკარიჯ როუდის ბინადრები 24 ქულით მე-15 ადგილზე არიან. პრემიერ ლიგაში აღზევებისთვის განკუთვნილ პლიოფებამდე გარსიას გუნდს 5 ქულა აშორებს.
