ზაფხულის სატრანსფერო ფანჯრის დროს დახარჯული თითქმის €150 მილიონის შემდეგ, ნაპოლისთვის ცხოვრება არა თუ გაუმჯობესდა, არამედ გაუარესდა. "პარტენოპეი" ნოემბრის სანაკრებო პაუზას მინი კრიზისით ხვდება, რასაც შესაძლოა ძირეული ცვლილებები მოჰყვეს.
სერია A-ს ბოლო ტურში, ბოლონიასთან განცდილი მძიმე მარცხის შემდეგ, ანტონიო კონტემ მედიასთან ისაუბრა:
"ეს უკვე ამ სეზონში მეხუთე მარცხი იყო, რაც რა თქმა უნდა ძალიან ცუდი შედეგია - ამ ყველაფერზე ვღელავ, ამას არ დავმალავ. თუ გუნდს სურს, რომ სკუდეტოს მთავარი ფავორიტი იყო, ნოემბრის დასაწყისისთვის 5 მატჩი წაგებული არ უნდა ჰქონდეს. ე.ი. რაღაც ისე არ მიდის, როგორც დაგეგმილი იყო.
როგორც უკვე ბევრჯერ ვთქვი, რაც გასულ სეზონში გავაკეთეთ, არაჩვეულებრივი იყო, თუმცა ეს განსხვავებული წელია. ჩვენ ვმუშაობთ, მაგრამ ჩემი აზრით, საკუთარ თავს უნდა ვკითხოთ, ვმუშაობთ თუ არა იმავე ენთუზიაზმითა და სურვილით, როგორც გასულ წელს?
გუნდის ენერგია ამ წელს შეიცვალა, მე ვერ ვგრძნობ იმ დადებით ენერგიას, რაც გასულ სეზონში გვქონდა. ბიჭებმა კარგად იციან, რომ ამას უკვე დიდი ხანია ვამბობ. მწყინს, რომ ბოლო ოთხი თვის განმავლობაში ვერ შევძელი ამ ენერგიის შეცვლა. ეს ნიშნავს, რომ საქმეს კარგად არ ვაკეთებ, ან კიდევ მეორე ვარიანტია, ვიღაცას არ სურს ჩემი მოსმენა."
უახლოეს საათებში, ანტონიო კონტე კლუბის მფლობელს, აურელიო დე ლაურენტისს შეხვდება, სადაც მხარეები სამომავლო გეგმებზე ისაუბრებენ. იტალიურ პრესაში გავრცელებულ ინფორმაციას თუ დავუჯერებთ, ამ შეხვედრაზე ყველაფერი განიხილება, მათ შორის თანამშრომლობის შეწყვეტაც კი.
