სულ რამდენიმე საათი გავიდა მას შემდეგ, რაც ლუჩანო სპალეტისა და იუვენტუსს შორის შეთანხმება შედგა. გამოცდილ იტალიელ მწვრთნელს ტურინში დღეს ელოდებიან, სადაც მხარეები კონტრაქტს გააფორმებენ.
ლუჩანო სპალეტი "ბიანკონერისთან" ხელშეკრულებას სეზონის ბოლომდე გააფორმებს, თუმცა იუვენტუსი ჩემპიონთა ლიგაზე გასვლას თუ მოახერხებს, კონტრაქტი 1 ან 2-წლით ავტომატურად გახანგრძლივდება.
იუვენტუსთან დაახლოებული წყაროები ლუჩანო სპალეტისა და ტურინული კლუბის ხელმძღვანელობას შორის შეხვედრის დეტალებს ასაჯაროებს, სადაც იტალიელი მწვრთნელის საინტერესო კომენტარი ხდება ცნობილი:
"კონტრაქტს მნიშვნელობა არ აქვს, რადგან მე მოედანზე დავამტკიცებ აქ დარჩენის ღირსი ვიქნები თუ არა. თუ ეს არ გამომივა, სწორი იქნება, რომ გუნდიდან გამიშვათ."
როგორც ჩანს, ლუჩანო სპალეტი ახალი გამოწვევისთვის სერიოზულად ემზადება. იტალიელი სპეციალისტი ახალ კლუბში მუშაობას მიმდინარე კვირაში დაიწყებს.
