სერია ა-ს იუთუბ გვერდმა დადო ვიდეორგოლი სახელწოდებით Made In Italy, რომლის გმირი არის ნაპოლის გარემარბი, ხვიჩა კვარაცხელია. ვიდეოში იხილავთ ქალაქ ნეაპოლის ღირსშესანიშნავ ადგილებსა და იმ საფეხბურთო ატმოსფეროს, რომლითაც იტალიის სამხრეთ რეგიონია განთქმული.
ამ ყველაფრის პარალელურად, მიმდინარეობს ქართველი შემტევის ინტერვიუ, რომელშიც ის საუბრობს არაერთ საინტერესო საკითხზე, მათ შორის თბილისის დინამოს აკადემიაში გატარებულ წლებზე:
"რვა წლის ვიყავი, როდესაც ფეხბურთის თამაში დავიწყე და 11 წლის ასაკში მოვხვდი დინამო თბილისის აკადემიაში, სადაც ხუთი წელი გავატარე. ძალიან კარგი აკადემიაა, რომელშიც არაერთ გამორჩეულ ფეხბურთელს უთამაშია. დინამო თბილისი მე ძალიან დამეხმარა", - განაცხადა ნაპოლის გარემარბმა ქართული კლუბის შესახებ.
კვარაცხელია დინამოს აკადემიაში ირიცხებოდა 2012-2017 წლებში, იმავე 2017-ში კი მან მთავარ გუნდშიც ითამაშა. ხვიჩამ თბილისურ კლუბში ჩაატარა 5 მატჩი, გაიტანა 1 გოლი და შეასრულა 1 საგოლე გადაცემა.
