ხვიჩა კვარაცხელიას ყოფილმა მთავარმა მწვრთნელმა მოსკოვის ლოკომოტივში, იური სიომინმა თავისი ექს-შეგირდის ლონდონის არსენალში შესაძლო ტრანსფერს გამოეხმაურა. რუსი დამრიგებლის თქმით, ქართველ ვინგერს თამაში შეუძლია ნებისმიერ ტოპ კლუბში, მათ შორის "მეთოფეებშიც".
"პარის სენ-ჟერმენმა გასულ სეზონში თავის გზაზე დაამარცხა პრემიერ ლიგის ყველა გუნდი, რომელსაც შეხვდა, მათ შორის არსენალიც. აღნიშნულ შეხვედრებში საუკეთესო იყო სწორედ კვარა, რომელმაც უკვე დაამტკიცა, რომ ნებისმიერ ტოპ კლუბში თამაში შეუძლია. ის მსოფლიო კლასის მოთამაშეა.
გასაკვირი არ არის, რომ ხვიჩას მიმართ ინტერესს სხვა გუნდებიც იჩენენ. ის წლიდან წლამდე პროგრესირებს და უკვე კარგად თამაშობს დაცვაშიც კი, რასაც წარსულში არ აკეთებდა. თამაშის წაკითხვის მხრივ პსჟ-ს ვინგერი საერთოდაც ერთ-ერთი საუკეთესოა", - განაცხადა "რკინიგზელთა" ყოფილმა დამრიგებელმა.
