ორგზის ოლიმპიური ჩემპიონობა, პარიზის ოლიმპიური თამაშები, გამარჯვების ემოცია, „300 არაგველი“, სამომავლო გეგმები და სხვა მნიშვნელოვანი თემის შესახებ ლაშა ბექაურმა LaGazzetta.ge-სთან ინტერვიუში ისაუბრა.
- რამდენიმე დღეა მეორედ გახდი ოლიმპიური ჩემპიონი, ეს მოვლენა უკვე გააცნობიერე?
- საოცარია, ისეთი გრძნობაა, რაც მთელი შენი ცხოვრების შრომის შემდეგ უნდა განიცადო.
- გამარჯვება მოგილოცეს წარმატებულმა ქართველმა სპორტსმენმა, მათ შორის ხვიჩა კვარაცხელიამ და ილია თოფურიამ, პირადად ესაუბრე?
- კი ჩვენ სულ გვაქვს კონტაქტი, მომილოცეს, უხარიათ, ბედნიერები არიან და ამაყობენ ჩემით, რაც მეც ძალიან მახარებს.
- შენი სამოტივაციო სიმღერა “300 არაგველი” ..
- “300 არაგველი” ჩემი ძმაკაცის, ზურა ბენიანიძის სიმღერაა და ვეტყვი, რომ მადლობა ჩემო ძმაო ასეთი შედევრი რომ შექმენი და პირადად შენ დიდი წვლილი შეგაქვს ჩემს გამარჯვებაში.
- საქართველოს დროშა და ჰიმნი, შენი დამსახურებით უმაღლეს საფეხურზე.....
- ეს ჩემთვის ძალიან ბევრს ნიშნავს, საქართველო როცა ჩემი შრომით ყველაზე მაღლაა საოცარი განცდაა, ჩემთვისაც და ყველა ქართველისთვის. მე ვფიქრობ, რომ ის ქართული სული და პატრიოტიზმი, რაც არის იმასთან ძალიან ახლოს ვარ და განსაკუთრებულად ვგრძნობ. ქართული დროშა ჩემთვის ყველაფერს ნიშნავს და ყველაზე ბედნიერი ვარ მაგ დროს, როცა ჩვენი სამშობლოს დროშას ყველაზე მაღლა ვხედავ.
- 31 ივლისს ყველაფერი კარგად მიდიოდა, გრძნობდი რომ ეს შენი დღე იყო?
- კი ყველაფერი კარგად მიდიოდა, კარგი განცდები მქონდა და ვგრძნობდი ღმერთის სიახლოვეს.
- ფინალი და ბოლო წამები, ომი ბოლო წამამდე, ეს ყველაფერი გახსოვს?
- ვერ გავაანალიზე ისე სწრაფად მოვიგე როცა ვაგებდი. ასეთ რთულ მომენტებში ღმერთის ძალას ვგრძნობ და ვხვდები, როგორ მეხმარება. ვიდრე ტატამზე გავიდოდი ვთქვი, რომ ყველაფერ უნდა ჩამედო ამ ბრძოლაში, მთელი ჩემი შრომა, ყველაფერი ერთად უნდა შემეგროვებინა და აქ ჩამედო. როცა გულით გინდა და შრომობ, ღმერთი გიფასებს ამ ყველაფერს.
- 23 წლის და 2 ოლიმპიადა ..- 24 წლის ვარ უკვე.
- დიახ, რამდენიმე დღის წინა გახდი და მგონი არ გახსოვდა...
- კი დამავიწყდა, ისე ვიყავით ოლიმპიადაზე კონცენტრირებულები ჩემი დაბადების დღე ნამდვილად აღარ მახსოვდა. სასწაულია, რა თქმა უნდა, ასეთი რამე ქართული და მსოფლიო ძიუდოს ისტორიაში არასდროს არ მომხდარა, 24 წლის ორგზის ოლიმპიური ჩემპიონი, 35 წლის ტედი რინერმა ახლა მომიხსნა რეკორდი…
- - 90 კგ. კატეგორია, ზურა ზვიადაური ოლიმპიური ჩემპიონი, შენი ნათლიაა...
- კი ზურა არის ჩემი ბავშვობის მოტივაცია, ძალიან ვამაყობ ამ ადამიანით...
- ნახევარფინალის შემდეგ, ლაშა გუჯეჯიანმა ხელით 1 განიშნა, რა გითხრა, ფინალზე კონცენტრირებისკენ მიგანიშნა?
- ზოგადად ჩვენ და კონკრეტულად მე, ვფიქრობ ყოველთვის და ვიცი, რომ ჩემპიონობისთვის ვარ დაბადებული, ვიღაცისთვის შეიძლება ოლიმპიური ფინალი ძალიან დიდი რაღაც იყოს და დაკმაყოფილდეს, მაგრამ ჩვენ ვიცით, რომ ფინალი არ არის დამაკმაყოფილებელი, ჩვენ მხოლოდ ოქროს მედლისთვის და ისტორიის დასაწერად ვიბრძვით. ნახევარფინალის შემდეგ ემოცია როცა გამოვხატე, ლაშა გუჯეჯიანმა შემომიძახა გვჭირდებოდა სიმშვიდე, ემოციების მოთოკვა და განწყობა ფინალისთვის…
- 4 ოლიმპიადის მოგებაა შენი მიზანი, რას აპირებ დასვენების შემდეგ?
- ჯერ დავისვენებ, შემდეგ გავაგრძელებ შრომას, ჩემს კოლექციას აკლია უფროსებში მსოფლიოს ჩემპიონატის ოქროს მედალი, ოლიმპიადა ბევრად მნიშვნელოვანია, მაგრამ ახლა მსოფლიოს ოქრო მაქვს მოსაპოვებელი.
მინდა მადლობა ვუთხრა ჩემს საყვარელ ქართველ ხალხს და ყველას ჩავეხუტო.
