ლიგა 1-ის გასულ ტურში გაიმართა ლე კლასიკი, რომელიც დასრულდა პარის სენ-ჟერმენის გამანადგურებელი გამარჯვებით, ანგარიშით 5:0. ეს იყო პირველი შემთხვევა, როცა ფრანგული ფეხბურთის მთავარ დუელში დაფიქსირდა მოგება 5-ბურთიანი სხვაობით. ისტორიული შეხვედრის მონაწილე აღმოჩნდა ხვიჩა კვარაცხელიაც, რომელმაც მარსელის ოლიმპიკის კარი ულამაზესი დარტყმით აიღო.
ცნობისთვის, ეს იყო ქართველი შემტევის პირველი გოლი ლე კლასიკში, დაპირისპირების საუკეთესო ბომბარდირი კი 11 ბურთით ზლატან იბრაჰიმოვიჩი არის. დავუბრუნდეთ გუშინდელი შეხვედრის ანგარიშს (5:0), რომელიც როგორც აღვნიშნეთ, რეკორდული და ისტორიული გამოდგა.
ოთხგოლიანი უპირატესობით პსჟ-ს უზეიმია გამარჯვება როგორც 1970-იან წლებში, ისე თანამედროვე ეპოქაშიც და ერთხელ მსგავსი სხვაობით 1980-იანებში პროვანსალელებმაც მოიგეს. გადიოდა ათწლეულები და დედაქალაქელები უპრინციპულესი მოწინააღმდეგის ჩრდილში მუდმივად რჩებოდნენ.
ყველაფერი შეიცვალა უკანასკნელ წლებში - პარკ დე პრენსის ბინადრებმა მარსელს ჯერ გაუსწრეს ჩემპიონობების რაოდენობით ლიგა 1-ში, შემდეგ კი ევროპის მთავარი საკლუბო ტურნირიც მოიგეს. 2025-დან, ოლიმპიკი აღარ არის ერთადერთი ფრანგული კლუბი ჩემპიონთა ლიგის თასით თავის კოლექციაში.
ერთი სიტყვით, პარის სენ-ჟერმენის დომინაცია პროვანსალურ გუნდზე ხდება უფრო და უფრო თვალსაჩინო, გუშინდელმა გამარჯვებამ კი შეიძლება ითქვას, რომ საბოლოო წერტილი დასვა. რთული სათქმელია, შეძლებენ თუ არა ველოდრომის ბინადრები პსჟ-სთვის ოდესმე საკადრისი პასუხის გაცემას.
