მილანის გარემარბი, რაფაელ ლეაო ზაფხულის სატრანსფერო ფანჯრის პერიოდში ორი კლუბის მთავარი სამიზნე იქნება. საუბარია პარი სენ-ჟერმენსა და ნიუკასლზე. Téléfoot-ის მტკიცებით, ფრანგულმა კლუბმა ვინგერის გადმობირების საკითხში პირველი ნაბიჯები უკვე გადადგა და იტალიელებმა ამის შესახებ იციან.
იგივე წყაროს თუ დავუჯერებთ, პორტუგალიელი შემტევი პსჟ-ს წინადადების განსახილველად მზად არის. რაც შეეხება მის სატრანსფერო ღირებულებას, "როსონერი" გარემარბს 90 მილიონ ევროდ აფასებს. ჯერჯერობით უცნობია, აპირებს თუ არა ფრანგული კლუბი "შავ-წითლების" ვინგერში ამ თანხის გადახდას.
შეგახსენებთ, რომ 24-წლის შემტევი სერია ა-ში თამაშობს 2019 წლიდან და იმის შემდეგ მან ყველა ტურნირზე 189 შეხვედრაში 49 გოლის გატანა მოახერხა. სან სიროზე ის გადმოვიდა ლილიდან, 35 მილიონ ევროდ. აქვე დავამატებთ, სტეფანო პიოლის გუნდის 10-იანი 2021 წლიდან პორტუგალიის ნაკრების წევრიც არის.
