საუბარია ტიერი ანრის შესახებ, რომელიც მადრიდის რეალის ამჟამინდელ მწვრთნელს ტურინის იუვენტუსში გადაეყარა. ეს ყველაფერი ხდებოდა 1998/1999 წლების სეზონის მეორე ნახევარში, როდესაც "ბებერ ქალბატონს" ჩავარდნა დაეწყო. კრიზისი იყო იმდენად თვალშისაცემი, რომ კალჩოს ყველაზე ტიტულოვანმა კლუბმა 1999 წლის თებერვალში მარჩელო ლიპიც კი გაუშვა.
იტალიელი მწვრთნელის ნაცვლად მივიდა სწორედ ანჩელოტი, რომელსაც "ბიანკონერიში" მონაკოდან ზამთარში გადმობირებული ფრანგი თავდამსხმელი დახვდა. ლონდონის არსენალის მომავალმა ლეგენდამ იტალიელი სპეციალისტის ხელმძღვანელობით ჩაატარა 16 მატჩი, რომელშიც გაიტანა სულ რაღაც 3 ბურთი და გააკეთა 2 ასისტი.
სეზონის დასრულების შემდეგ, დელე ალპის ბინადრებმა თავიანთი მეექვსე ნომერი გაყიდეს "მეთოფეებში", არსენ ვენგერთან. რამ განაპირობა მისი ტრანსფერის ჩავარდნა? ამის შესახებ თავად 47 წლის ყოფილმა ფორვარდმა ისაუბრა: "იუვეში მათამაშებდნენ ფლანგზე, მეტოქის კარებსა და საჯარიმოსგან შორს ვიყავი.
დროის უმეტეს ნაწილს ვატარებდი დაცვაში და როდესაც ვუტევდით, ჩემზე წინ ორი ფეხბურთელი ყოველთვის იმყოფებოდა. ჩემთვის ეს უცხი ხილი იყო. მონაწილეობას ვიღებდი ყველა მატჩში, მაგრამ ვერ ხვდებოდი, თუ რა ფუნქციები მქონდა", - იხსენებს ანრი.
