როგორც მოგეხსენებათ, ლივერპულმა ჯოვანი ლეონი გაიფორმა. ახალგაზრდა ცენტრალური მცველისთვის იბრძოდნენ ინტერი და მილანი, მაგრამ იტალიელმა უკანახაზელმა მერსისაიდი აირჩია. ბრიტანული პრესა უკვე წერს იმ რისკ ფაქტორების შესახებ, რომელიც მის ტრანსფერს უკავშირდება.
პირველი და მთავარი ფაქტორია ის, თუ როგორ უჭირთ ზოგადად იტალიელ ფეხბურთელებს "წითლებში" ათამაშება. თავად განსაჯეთ - პარმას ყოფილი უკანახაზელის გამოჩენამდე, ენფილდზე ითამაშა შვიდმა აპენინელმა: ალბერტო აკვილანიმ, მარიო ბალოტელიმ, ფაბიო ბორინიმ, ფედერიკო კიეზამ, ანდრეა დოსენამ, დანიელე პადელიმ და გაბრიელ პალეტამ.
ჩამოთვლილი შვიდეულიდან ერთმა ფეხბურთელმაც კი ვერ მოახერხა ლივერპულში მინიმუმ 40 მატჩის ჩატარება და თუნდაც 5 გოლის გატანა. თამაშების მხრივ საუკეთესო შედეგი აქვს ბორინის, რომელმაც მერსისაიდში 38 შეხვედრა ჩაიწერა. რაც შეეხება მთავარ გოლეადორს, პირველ პოზიციაზე 4 გატანილი ბურთით ბალოტელია.
მეორე რისკ ფაქტორი არის "წითლების" ახალი მე-15 ნომრის ასაკი (18 წელი) და გამოცდილება. გასულ სეზონში მან "ჯალობლუში" ჩაატარა 17 შეხვედრა, აქედან ძირითადში ის 14 თამაშში იყო. დიახ, ლეონი გამოცდილი ფეხბურთელი კალჩოს მასშტაბითაც არ არის, ამიერიდან კი ის ალბიონზე ითამაშებს.
მესამე რისკ ფაქტორი არის კონკურენცია. ენფილდზე იტალიელი ცენტრალური მცველის პოზიციაზე თამაშობენ ვირჯილ ვან დაიკი, იბრაჰიმა კონატე და ჯო გომესი. ისმის კითხვა: როგორ წარმოგიდგენიათ აღნიშნულ ტრიოსთან კონკურენციაში მყოფი 18 წლის ჯოვანი? დიახ, ამის წარმოდგენა ნამდვილად რთულია.
ცხადია, ეს ყველაფერი უბრალოდ ვარაუდია და არნე სლოტის გუნდის ცენტრალური მცველის მიმართებაში გადაწყვეტილი არაფერია. მის გარშემო ტრიალებს ბევრი კითხვა, რომელსაც პასუხი 2025/26 წლების სეზონში გაეცემა.
