2020 წლის ოქტომბერში ჯანლუკა დი მარციომ გამოუშვა წიგნი სახელწოდებით Grand Hotel Calciomercato, რომელშიც საკმაოდ დიდი ადგილი დაუთმო ლეო მესის არშემდგარ ტრანსფერს ბარსელონადან ლონდონის ჩელსიში. ყველაფერი დაიწყო 2014 წლის იანვარში, როდესაც არგენტინელმა ფლეიმეიქერმა გადასახადების სახით ესპანეთის ხაზინას 53 მილიონი გადაუხადა.
კატალონიელთა შემტევი სერიოზულად ფიქრობდა საცხოვრებელი ქვეყნისა და ჩემპიონატის გამოცვლაზე, მთავარ ვარიანტად კი "არისტოკრატებში" გადასვლა განიხილებოდა. "ბლაუგრანას" მე-10 ნომერსა და ინგლისურ კლუბს შორის შუამავალი აღმოჩნდა დეკუ დე სოუზა, რომელიც იმ დროს აგენტად მუშაობდა.
პორტუგალიელმა ყოფილმა ნახევარმცველმა დააორგანიზა საქმიანი საუბარიც კი "ლა პულგასა" და სტემფორდ ბრიჯის იმდროინდელ დამრიგებელს, ჟოზე მოურინიოს შორის. იტალიელი ინსაიდერის მტკიცებით, სკანდალურმა სპეციალისტმა მესის თავდაპირველად ურჩია კარგად დაფიქრება, მაგრამ კამპ ნოუს დატოვების მტკიცედ გადაწყვეტის შემთხვევაში, პორტუგალიელი ტაქტიკოსი მას სიხარულით შეეგებებოდა.
არგენტინელი შემტევის რომან აბრამოვიჩის კლუბში ტრანსფერი აქტუალური გახდა მას შემდეგაც, რაც ფეხბურთელმა სხვადასხვა სოციალურ ქსელებში ინგლისური კლუბის არხი გამოიწერა. რაც შეეხება ტრანსფერის ფინანსურ მხარეს, ლეოს ხოსეპ მარია ბართომეუს კლუბიდან გამოსყიდვა ღირდა 250 მილიონი და ამ თანხის გადახდაზე ჩელსი თანახმა იყო.
ამის გარდა, ბარსელონას შემტევს ლონდონელები ყოველწლიური ანაზღაურების სახით 56 მილიონ ევროს სთავაზობდნენ. მოლაპარაკებები და სპეკულაციები გრძელდებოდა რამდენიმე თვე, რის შემდეგაც ტრანსფერში გამოჩნდა კიდევ ერთი შუამავალი, სესკ ფაბრეგასი, რომელიც იმ დროს კატალონიიდან სწორედ "არისტოკრატებში" გადავიდა.
რით დასრულდა ეს ისტორია? ტრანსფერი დაბლოკა "ბლაუგრანას" ათიანის მამამ, ხორხემ, რომელმაც ყველაფერი იღონა იმისთვის, რომ მისი შვილი მოურინიოს გუნდში არ გადასულიყო. წლების შემდეგ, "ლა პულგას" ჰკითხეს არშემდგარი ტრანსფერის შესახებ, რაზეც ვარსკვლავურმა ფლეიმეიქერმა განაცხადა, რომ მან ამის შესახებ არაფერი იცოდა.
