დღეს, 23:45 საათზე, პორტუგალიის სუპერთასის ფარგლებში გაიმართება ლისაბონური დერბი - ქვეყნის ჩემპიონი სპორტინგი, თასის გამარჯვებული ბენფიკას წინააღმდეგ. როგორც ვხედავთ, გიორგი ქოჩორაშვილს შეუძლია პირველი ტიტულის მოგება თავის ოფიციალურ სადებიუტო შეხვედრაშივე.
დიახ, ამხანაგურმა მატჩებმა აჩვენა, რომ ქართველი ნახევარმცველი არ იყო სრულფასოვნად მზად და ამის მიზეზი არის გასულ სეზონში მიღებული ტრავმა, მაგრამ პორტუგალიური პრესა წერს, რომ "არწივებთან" შეხვედრისთვის ახალწვეული შუახაზელი აუცილებლად მწყობრში იქნება.
ჯერჯერობით უცნობია, სასტარტოდან დაიწყებს "ლომების" ნახევარმცველი თუ სათადარიგოთა სკამიდან, ყველაფერს უშუალოდ მატჩის დაწყებისას გავიგებთ. ალვალადეს ბინადრები იწყებენ ახალ ერას, რომელშიც ვიქტორ გიოკერეში აღარ არის. როგორც ვიცით, 102 შეხვედრაში 97 ბურთის გამტანი შვედი ფორვარდი ლონდონის არსენალში გადავიდა.
ვნახოთ, როგორ მოახერხებს რუი ბორჟესის გუნდი "მეთოფეების" თავდამსხმელის ჩანაცვლებას. ცხადია, ეს არ ეხება ახალწვეულ 26 წლის შუახაზელს, რომელსაც ექნება სულ სხვა ფუნქცია-მოვალეობები, მაგრამ ფაქტია, სპორტინგის არსებული სტანდარტის შენარჩუნება მისი საქმეც იქნება.
სტანდარტი კი უმაღლესი მიზნებისთვის ბრძოლაა, ჩემპიონობა - სტატუსი, რომელსაც ლისაბონელები ზედიზედ ორი სეზონია ატარებენ. რაც შეეხება და ლუჟის ბინადრებთან შეხვედრას, ეს იქნება რიგით 101-ე დაპირისპირება. "ლომებმა" აქამდე შეძლეს მხოლოდ 29 თამაშის მოგება, 45-ჯერ იმარჯვა ბენფიკამ, 26-ჯერ კი ფრე დაფიქსირდა.
