ლივერპულის ყოფილმა ცენტრალურმა მცველმა, ჯეიმი კარაგერმა დიოგუ ჟოტას შესახებ ისაუბრა. ინგლისელი ექს-უკანახელის აზრით, პორტუგალიელს აქვს თვისება, რომლითაც ის "წითლების" ლეგენდარულ ფორვარდებსაც კი აღემატება.
"ლივერპულში ვთამაშობდი სუარესის, ტორესის, ოუენისა და ფაულერის გვერდით, თუმცა მომენტის დაგვირგვინების მხრივ, აღნიშნულ ოთხეულზე მაღლა ჟოტას ვაყენებ.
მიმდინარე სეზონში ის საშუალოდ ყოველ 84 წუთში იტანს გოლს ან საგოლე გადაცემას აკეთებს. დიოგუზე უკეთესი შედეგი პრემიერ ლიგის მხოლოდ ორ ან სამ მოთამაშეს აქვს.
ის არის ჩვენი კლუბის უკანასკნელი 5-6 წლის გამართული სატრანსფერო პოლიტიკის განსახიერება", - განაცხადა მერსისაიდული გუნდის ყოფილმა ცენტრბექმა.
აღსანიშნავია, რომ ენფილდელი გულშემატკივარი 45-წლის ვეტერანის აზრს არ იზიარებს. ბრიტანელი ყოფილი მცველის კომენტარის შემდეგ, სოციალურ ქსელში ჩატარდა გამოკითხვა, რომლის მიხედვითაც ფანებს სუარესს, სალაჰს, ფაულერსა და ჟოტას შორის საუკეთესო ფინიშერი უნდა აერჩიათ.
ყველაზე ნაკლები ხმა (11.2%) მიიღო სწორედ პორტუგალიელმა თავდამსხმელმა, საუკეთესო სამეული კი იყო ასეთი - ურუგვაელი (43%), ინგლისელი (32.3%), ეგვიპტელი (13.5%).
გამოკითხვის დასრულების შემდეგ, კარაგერმა გააკეთა შემდეგი კომენტარი: "სუარესი აღნიშნულ ოთხეულში საუკეთესო ფეხბურთელია, მაგრამ არა საუკეთესო ფინიშერი", - განაცხადა ინგლისელმა.
