ხვიჩა კვარაცხელიას შენარჩუნება - ეს არის საკითხი, რომელიც აურელიო დე ლაურენტისისთვის პრიორიტეტულია. მისი ხედვით, მომავლის ნაპოლი სწორედ ქართველი ვინგერის გარშემო იქნება აშენებული. ვიქტორ ოსიმენის პოტენციური წასვლის შემდეგ კი "პარტენოპეის" მთავარი ვარსკვლავი სწორედ საქართველოს ნაკრების შემტევი იქნება.
იტალიელი ბიზნესმენი მალე შეხვდება "აძურის" 77-ე ნომრის აგენტს, მამუკა ჯუღელს და რთული გამოსაცნობი არ არის, თუ რის შესახებ ისაუბრებენ ისინი. "ლურჯების" პრეზიდენტის მიზანი 23 წლის ვინგერის დაყოლიებაა, მისი აგენტი კი არ უარყოფს, რომ მხარეები არა წასვლის, არამედ დარჩენისკენ იხრებიან.
74 წლის ბიზნესმენის გეგმაშია კვარაცხელიასთვის ხელფასის გაზრდა და ახალი კონტრაქტის თანახმად, მისი ანაზღაურება მართლაც შეიცვლება. ქართველმა ვინგერმა მარადონაზე ხელშეკრულებას ხელი 2022 წლის ზაფხულში მოაწერა და ხელფასის სახით მას დღემდე წელიწადში 1.5 მილიონი აქვს. თავად დე ლაურენტისის სიტყვებით, მაშინ ნაპოლი სულ სხვანაირი იყო, ისევე როგორც თავად ხვიჩა.
