"მამარდას ფორმაზე, სომხეთთან შანსებზე და ახალგაზრდებზე", - სანიოლის სრული პრესკონფერენცია

ერთა ლიგის მატჩების წინ, სადაც საქართველოს ნაკრები სომხეთს დაუპირისპირდება, პრესკონფერენცია ჩვენი ნაკრების მთავარმა მწვრთნელმა ვილი სანიოლმა გამართა.

ნაკრების წინა მატჩებზე: "წლის ბოლო იყო და ბევრი ფეხბურთელი თამაშებს გადაღლილი შეხვდა. ზაფხულიდან მოყოლებული მათ ძალიან ბევრი მატჩის ჩატარება მოუწიათ. ევროპის ჩემპიონატმაც თავისი როლი ითამაშა და წლის ბოლოს ფსიქოლოგიური და ფიზიკური დაღლილობა ეტყობოდათ. ვფიქრობ, მომავალ თამაშებს ისინი უკეთეს ფორმაში და უფრო დასვენებულები შეხვდებიან."

კაშია-კვარაცხელიას დანაკლისზე: "ისინი ჩვენთვის მნიშვნელოვანი ფეხბურთელები არიან - კაპიტანი და შეტევის ლიდერი, თუმცა გვყავს სხვა ფეხბურთელები, რომლებსაც მათი ჩანაცვლება შეუძლიათ. მაგალითად, საბა გოგლიჩიძე, რომლის დებიუტსაც უფრო ადრე ველოდით. მოუთმენლად ველი მის თამაშს ნაკრებში."

სომხეთთან შანსებზე: "საკმაოდ მნიშვნელოვანი დერბი გველის. ყველანი ძალიან მოტივირებულები ვართ, რომ წელი წარმატებით დავიწყოთ. C დივიზიონის დონის ნაკრები ნამდვილად არ ვართ, ამიტომ ახლა ჩვენი მიზანი B დივიზიონში ადგილის შენარჩუნებაა."

კაპიტანი კაშიას არყოფნაში: "პირველ შეხვედრაში, გურამ კაშიას არყოფნაში ნაკრების კაპიტანი ოთარ კიტეიშვილი იქნება, რომელსაც ლიდერული თვისებები აქვს და ამაში პოზიციაც ხელს უწყობს."

გიორგი მამარდაშვილზე: "მამარდაშვილმა და ვალენსიამ  სეზონი მძიმედ დაიწყეს. ვფიქრობ, მამარდა ერთ-ერთი ის ფეხბურთელია, ვისაც დასვენება სჭირდებოდა, რადგან ბოლო ორ წელში ძალიან ბევრი მატჩი ჩაატარა. ის მაღალი დონის მეკარეა და დარწმუნებული ვარ, მომავალში ისევ ძველ ფორმას დაუბრუნდება."

ხვიჩა კვარაცხელიაზე: "ბედნიერი ვარ, რომ კვარაცხელია პარიზში გადავიდა. ისიც ბედნიერია და ეს მოედანზე ჩანს. კარგად ვხედავთ, რომ ხვიჩა მოედანზე ბევრს შრომობს, პროდუქტიულია როგორც დაცვაში, ისე შეტევაში და მისგან ნაკრებშიც იგივეს ველი."

მიმართვა გულშემატკივრებს: "გულშემატკივრის გარეშე ამ წარმატებას ვერ მივაღწევდით და მომავალშიც ასე იქნება. ერთნაირი კოლექტივი ვართ, ერთმანეთთან დაკავშირებული და ვაფასებთ მათ მხურვალე მხარდაჭერას. მომავალ მატჩებშიც ასე იქნება და ვეცდებით, ამის ხარჯზე წარმატებას მივაღწიოთ."

ვინ შეცვლის კვარაცხელიას?: "მას ვერავინ შეცვლის, ის უნიკალური მოთამაშეა. გვყავს ბევრი კარგი ფეხბურთელი, მაგრამ კვარაცხელია შეუცვლელია. მის არყოფნაში გარკვეული ტაქტიკური ცვლილებების განხორციელება მოგვიწევს და ეს სხვა ფეხბურთელებს შესაძლებლობას მისცემს, რომ თავი წარმოაჩინონ."

ფეხბურთთან ახლოს #2 | რატომ უნდა დავრჩეთ B ლიგაში აუცილებლად - ჩემპიონთა ლიგის მთავარი ფავორიტები