2020 წლის 24 სექტემბერს ქართული გუნდი ევროპა ლიგის საკვალიფიკაციო მატჩში გრანადას ეთამაშებოდა, სადაც, ლოპესის თქმით, მამარდაშვილმა "დიდებული შეხვედრა ჩაატარა".
"მას 8 თვის განმავლობაში ვაკვირდებოდი და ზუსტად იმ დღეს "აფეთქდა", როგორც ფეხბურთელი".
ლოპესი აღიარებს, რომ როდესაც გიორგი სხვა კლუბებს შესთავაზა, მათგან შემდეგი პასუხი მიიღო: "ქართველი? ანტონიო..."
ადამიანი, რომელიც მამარდაშვილს მხარს ყველაზე მეტად უჭერდა, ვალენსიას აკადემიის დირექტორი - ლუის მარტინესი გახლდათ:
"მოლაპარაკებები საკმაოდ დაძაბულად მიმდინარეობდა, საუბარი თავიდან 350 000 ევროზე დაიწყო და 850 000 ევროზე შეთანხმდნენ".
საინტერესოა, რომ ფეხბურთელს ვალენსიას აკადემიაში არასდროს უთამაშია, ვინაიდან, მას ძირითად გუნდში თამაშის შანსი იასპერ სილესენისა და ხაუმე დოემენეკის ტრავმების შედეგად მიეცა.
"პირველ თამაშში იღბლიანი არ იყო, თუმცა ძლიერი იყო და განვითარებისთვის ბევრი იშრომა. მარტო ცხოვრობდა და ყველა დოკუმენტი მე გავუმზადე. საქართველოში მხოლოდ 800 ევროს გამოიმუშავებდა".
ვალენსიაში გადაბარგების დღიდან გიორგიმ კარი ღირსეულად ჩაიბარა და ლა ლიგაში მონაწილეობა 84 მატჩში მიიღო, საიდანაც 24 მატჩში კარი მშრალად შეინახა. ამჟამად მისი სატრანსფერო ღირებულება 35 მილიონ ევროს შეადგენს, რითაც ლა ლიგის მასშტაბით ყველაზე ძვირადღირებული მეკარეა. აღსანიშნავია ის ფაქტი, რომ აღნიშნულ ასპექტში ქართველი ვარსკვლავი ისეთ ფეხბურთელებზე წინ იმყოფება, როგორებიც ტიბო კურტუა, იან ობლაკი და მარკ-ანდრე ტერ შტეგენი არიან.
"მას წინ დიდი გზა აქვს გასავლელი. ეჭვგარეშე ვფიქრობ, რომ ევროპის საუკეთესო მეკარე გახდება. საკუთარ შესაძლებლობებს ყოველდღე აუმჯობესებს", - აცხადებს ლოპესი AS-თან ინტერვიუში.
შეგახსენებთ, რომ საქართველოს ეროვნულმა ნაკრებმა საბერძნეთის ნაკრებს ევროპის საკვალიფიკაციო ეტაპის ფლეიოფის ფინალურ შეხვედრაში სძლია. ამ გამარჯვებაში უდიდესი როლი გიორგი მამარდაშვილსაც მიუძღვის.
