დიეგო მარადონას ევროპაში სხვადასხვა დროს უთამაშია ბარსელონაში, ნაპოლისა და სევილიაში. აღსანიშნავია, რომ ერთი არაოფიციალური შეხვედრა არგენტინელმა ფლეიმეიქერმა ჩაატარა ტოტენჰემის მაისურითაც. ეს მოხდა 1986 წლის მაისში, ოსი არდილესისთვის მიძღვნილ საიუბილეო, ამხანაგურ თამაშში.
ჰოტსპურის მოწინააღმდეგე იყო მილანის ინტერი, რომელიც ინგლისურმა გუნდმა 2:1 დაამარცხა. ეს ყველაფერი ხდებოდა 1986 წლის მუნდიალამდე, იმ ტურნირამდე, რომლის მიმდინარეობისას არგენტინის ეროვნული გუნდის იმდროინდელმა კაპიტანმა ინგლისის ნაკრების წინააღმდეგ ფეხბურთის ისტორიაში ერთ-ერთი ყველაზე სკანდალური შეხვედრა ჩაატარა.
რაც შეეხება არდილესს, ის იყო ინგლისის ჩემპიონატის ერთ-ერთი პირველი ვარსკვლავური ლეგიონერი, რომელმაც ლონდონში 1978-1988 წლებში 240-მდე შეხვედრა ჩაატარა. ცხადია, არგენტინელი ფლეიმეიქერისთვის მიძღვნილი საიუბილეო თამაში "ალბისელესტეს" ლეგენდარული მე-10 ნომრის გარეშე უბრალოდ ვერ ჩაივლიდა.
დავუბრუნდეთ 1986 წლის მსოფლიო ჩემპიონატს, რომლის მეოთხედფინალში "ლა სელესიონმა" ბრიტანელებს სწორედ "ფეხბურთის უგვირგვინო მეფის" დუბლით მოუგო. ორივე ბურთი გამოდგა ერთმანეთზე ეპოქალური: თავდაპირველად "ღმერთის ხელი"...გოლი, რომელიც მარადონამ შეაგდო ხელის გამოყენებით.
ოთხი წუთით მოგვიანებით კი არგენტინელმა შემტევმა მოქმედება დაიწყო მოედნის ცენტრში, შემდეგ მოატყუა "სამი ლომის" ხუთი წევრი, ბოლოს კი გოლკიპერიც, პიტერ შილტონი. საინტერესოა ისიც, რომ ბობი რობსონის გუნდში თამაშობდა ორი მოთამაშე უაით ჰართ ლეინიდან: გლენ ჰოდლი და კრის უადლი.
აღნიშნულმა დუეტმა ტოტენჰემის მაისურით რამდენიმე თვით ადრე ითამაშა დიეგოს გვერდითაც, ოსვალდოს საიუბილეო მატჩში. იმ შეხვედრის დასრულების შემდეგ, ჰოდლმა განაცხადა, რომ არგენტინის ეროვნული გუნდის იმდროინდელი კაპიტანი საუკეთესო ფეხბურთელია, ვის გვერდითაც მას უთამაშია.
