ჩელენჯ თასის 2024/25 წლების სეზონის ჯგუფური ეტაპის ბოლო მატჩში, შავი ლომი შოტლანდიაში ედინბურგს დაუპირისპირდა და 36-15 დამარცხდა.
მატჩის პირველი ტაიმი მასპინძლების სრული უპირატესობით წარიმართა და 24-3 გამარჯვებით დასრულდა. ედინბურგის სამ გარდასახულ ლელოს და ერთ ჯარიმას, შავმა ლომმა მხოლოდ მატკავას ჯარიმით უპასუხა. აღსანიშნავია, რომ 35-ე წუთზე შოტლანდიელები 10 კაცით დარჩნენ — წითელი ბარათი ბრედბერიმ მიიღო.
მეორე ნახევარში მოედანზე თანაბარი დაპირისპირება ვიხილეთ, თუმცა, ქართული ფრანჩიზასთვის ეს საკმარისი არ აღმოჩნდა. შესვენების შემდეგ, ქართველმა მორაგბეებმა ორი ლელო დადეს — თავი კვატაძემ და აფციაურმა გამოიჩინეს, ხოლო ერთი გარდასახვა ზუსტად მატკავამ შეასრულა. მეორე ტაიმში ედინბურგმაც 12 ქულის მოგროვება მოახერხა და საბოლოო ანგარიში, 36-15 დაფიქსირდა.
შავი ლომისთვის ჩელენჯ თასის 2024/25 წლების ჯგუფური ეტაპი ერთი გამარჯვებით და სამი მარცხით დასრულდა. ქართულმა გუნდმა პირველივე ტურში ვანს მოუგო, ხოლო შემდეგ ზედიზედ სამი მატჩი სკარლეტსთან, ავირონ ბაიონასთან და ედინბურგთან დათმო.
მარცხი ედინბურგში — შავმა ლომმა ჩელენჯ თასზე ასპარეზობა დაასრულა
