ვიქტორ ბონიფეისის ლევერკუზენის ბაიერიდან - მილანში ტრანსფერი ჩაიშალა, რადგან თავდამსხმელმა სამედიცინო შემოწმების გავლა ვერ შეძლო. ამ ფაქტის შემდეგ, ნიგერიელმა ფორვარდმა გამოაქვეყნა პოსტი, რომელშიც მასხარები უწოდა იმ ადამიანებს, ვინც მის პროფესიონალიზმში ეჭვი შეიტანა.
"ამბობენ, რომ ბონიფეისი საქმეს არასერიოზულად ეკიდება. მე ვთამაშობ ლევერკუზენის დონის გუნდში, ჩემი გადმობირება სურს მილანს, მაგრამ მათთვის მაინც არასერიოზული ვარ. გამოდის, სერიოზული რომ ვიყო, იუპიტერის რომელიმე კლუბში ვითამაშებდი. გარშემო იმდენი მასხარა არის."
ბაიერის თავდამსხმელის განცხადების ადრესატი იყო ნიგერიული პრესა, რომელმაც წარსულში არაერთხელ დაწერა ფეხბურთელის არასერიოზული მიდგომის გამო. "როსონერიში" ჩაშლილი ტრანსფერის შემდეგ, ნიგერიელი ფორვარდის "არასერიოზულობა" გახდა კვლავ აქტუალური, მაგრამ ტრანსფერის ჩაშლის რეალური მიზეზი მოთამაშის ტრავმაში მდგომარეობს.
