პრემიერ ლიგის პირველი ტურის ცენტრალურ მატჩში ლონდონის არსენალი მანჩესტერ იუნაიტედს ესტუმრება. ზაფხულის სატრანსფერო ფანჯრის პერიოდში ორივე კლუბი საგრძნობლად გაძლიერდა. "წითელი ეშმაკების" რიგები შეავსეს მათეუს კუნიამ, ბენჟამინ შეშკომ და ბრაიან მბიომომ.
"მეთოფეების" მხრიდან კი საკმარისია გავიხსენოთ ერთი ფეხბურთელი - ვიქტორ გიოკერეში. საუბარია თავდამსხმელზე, რომელმაც თავის წინა კლუბში, ლისაბონის სპორტინგში 102 შეხვედრაში 97 ბურთი შეაგდო. ბრაიტონში ვერ დამკვიდრებისა და რამდენიმე გუნდის მოვლის შემდეგ, შვედი ფორვარდი სრულფასოვნად "ლომებში" გაიხსნა.
ემირეიტსის ბინადრების ახალწვეული თავდამსხმელის კარიერის რეანიმირებაში უდიდესი როლი ითამაშა რუბენ ამორიმმა, რომელიც დღეს, მისი მეტოქის რანგში იქნება. სწორედ პორტუგალიელი თავკაცის მოღვაწეობის დროს გადმოვიდა მიკელ არტეტას გუნდის ამჟამინდელი მე-14 ნომერი ალვალადეზე.
27 წლის თავდამსხმელმა ოლდ ტრაფორდის ბინადრების მწვრთნელის ხელმძღვანელობით 68 მატჩში გაიტანა 66 გოლი, რაც მისი კარიერის საუკეთესო შედეგია. გიოკერეშმა გოლების გატანას არც 40 წლის თავკაცის წასვლის შემდეგ მოუკლო და აღნიშნულ 66 ბურთს კიდევ 31 დაუმატა.
სპორტინგი ახალ სეზონს იწყებს ამორიმისა და შვედი თავდამსხმელის გარეშე, რადგან როგორც აღვნიშნეთ, ერთი მათგანი მანჩესტერშია, მეორე კი არსენალში. ჩვენს წინაშეა რომელიმე ნაწარმოების ან ფილმის კლასიკური სიუჟეტი, როდესაც ოსტატი უპირისპირდება ურჩხულს, რომელიც მან თავისივე ხელებით შექმნა.
კვირის სხვა გამორჩეული მატჩები
| დრო | მატჩი | ტურნირი |
| 17:00 | ჩელსი - კრისტალ პალასი | პრემიერ ლიგა |
| 19:15 | მეცი - სტრასბურგი | ლიგა 1 |
| 19:30 | მან იუნაიტედი - არსენალი | პრემიერ ლიგა |
| 20:00 | მონცა - ფროზინონე | კოპა იტალია |
| 22:45 | ნანტი - პსჟ | ლიგა 1 |
| 23:15 | მილანი - ბარი | კოპა იტალია |
| 23:30 | ესპანიოლი - ატლეტიკო | ლა ლიგა |
| 23:30 | სპორტინგი - არუკა | პრიმეირა ლიგა |
