მატჩის დღე - არსენალი შეცდომის დაშვების უფლების გარეშე

პრემიერ ლიგის საჩემპიონო ბრძოლა შედის დასკვნით ფაზაში და დღეს, პირველი ადგილიდან ჩამოქვეითებული ლონდონის არსენალი ნიუკასლს შეხვდება. განვიხილოთ, თუ რას უნდა ველოდოთ აღნიშნული დუელისგან.

არსენალი V ნიუკასლი | 20:30

პრემიერ ლიგის მთელი სეზონის განმავლობაში პირველ ადგილზე ყოფნის შემდეგ, არსენალმა ჩემპიონატის ბოლოსკენ ლიდერობა დაკარგა. მანჩესტერ სიტისა და ლონდონელებს შორის არის ქულათა თანაფარდობა, 70-70, მაგრამ ბურთების უკეთესი ბალანსის ხარჯზე, პირველ პოზიციაზე ამ მომენტისთვის ინგლისის 10-გზის ჩემპიონები არიან.

"მეთოფეებს" აღარ აქვთ შეცდომის დაშვების უფლება და შესაძლოა ეს გარემოებაც კი არ იყოს საკმარისი. მათ სჭირდებათ ორი რამ - "ქალაქელთა" ფეხის დაცდენა და დარჩენილ შეხვედრებში რაც შეიძლება დიდი ანგარიშით მოგება. ემირეიტსის მკვიდრთა მოწინააღმდეგე დღეს მძიმე მდგომარეობაში მყოფი ნიუკასლი იქნება.

ზედიზედ ოთხი მარცხი, 18 მარტიდან - დღემდე, ასეთია "კაჭკაჭების" მონაგარი. მათ არ ემუქრებათ ჩემპიონშიპში დაქვეითება, თუმცა არც მოწინავე პოზიციაზე აღზევება. შესაშურ ფორმაში არც მიკელ არტეტას შეგირდები იმყოფებიან: მხოლოდ 1 მოგება უკანასკნელ 6 შეხვედრაში. სწორედ აღნიშნულმა ჩავარდნამ განაპირობა ლიდერობის დაკარგვა.

ის ერთი გამარჯვებაც იყო ჩემპიონთა ლიგაზე, ლისაბონის სპორტინგთან, უშუალოდ პრემიერ ლიგაში კი არსენალი 14 მარტის შემდეგ ვერ იგებს. ვნახოთ, შეძლებენ თუ არა ლონდონელები დღეს ნავსის გატეხვას, ან იქნებ აღნიშნული რამ "ჯორდებმა" გააკეთონ. რაც შეეხება "მეთოფეთა" მთავარ კონკურენტს, პეპ გუარდიოლას შეგირდებს ელით სათასო შეხვედრა საუთჰემპტონთან, 4 მაისიდან კი ისევ შიდა ჩემპიონატი.

ეს იქნება ამ გუნდების რიგით 191-ე მატჩი და იქამდე, 83-ჯერ იმარჯვეს არსენალის ფეხბურთელებმა, 69-ჯერ - სენტ ჯეიმს პარკის ბინადრებმა, 38 შეხვედრა ფრედ დასრულდა. უკვე ზედიზედ 8 თამაშია, რაც აღნიშნული კლუბები არ დაზავებულან: 4-ჯერ მოიგეს ლონდონელებმა, 4-ჯერაც ედი ჰაუს შეგირდებმა.

შაბათის მატჩის დღე