მატჩის დღე - ჩემპიონთა ლიგა | დაუმარცხებელი გუნდების დუელი

დღეს გაიმართება ჩემპიონთა ლიგის ფაზის მეხუთე ტურის დარჩენილი ცხრა მატჩი. ცენტრალურ დაპირისპირებად შეგვიძლია მივიჩნიოთ მიუნხენის ბაიერნის სტუმრობა ლონდონში, არსენალთან. ორივე გუნდმა ამ მომენტამდე 4/4 შეხვედრა მოიგო.

არსენალი V ბაიერნი

როგორც აღვნიშნეთ, ბაიერნსა და არსენალს 100-პროცენტიანი შედეგი აქვთ. გერმანულმა მანქანამ დაამარცხა პარის სენ-ჟერმენი, ჩელსი, ბრიუგე და პაფოსი. ლონდონელებმა მოუგეს ატლეტიკოს, ბილბაოს, ოლიმპიაკოსსა და სლავიას. გამოსარჩევია ისიც, რომ დღევანდელი შეხვედრა ინგლისისა და გერმანიის ჩემპიონატების ლიდერების დუელია.

მიუნხენელების პირველი ადგილი ბუნდესლიგაში ნამდვილად არ არის გასაკვირი, "მეთოფეების" საჩემპიონო სვლა კი მიმდინარე სეზონის ერთ-ერთი ყველაზე საინტერესო მოვლენაა. ვნახოთ, როგორ წარიმართება ემირეიტსის ბინადრების ბედი სეზონის ბოლომდე, როგორც ევროსარბიელზე, ისე შიდა ჩემპიონატშიც.

ეს იქნება აღნიშნული გუნდების რიგით მე-15 მატჩი. რვა შემთხვევაში იმარჯვა "რეკორდმაისტერმა", სამჯერ - არსენალმა, სამი თამაშიც ფრედ დასრულდა. ტომას მიულერი ერთადერთი მოთამაშეა, რომელმაც ამ დუელში შეაგდო 5 ბურთი, მაგრამ ის ალიანც არენას ბინადრების განკარგულებაში აღარ არის.

აღნიშნულ წყვილში საინტერესოა 2015 - 2017 წლების შუალედი, როდესაც ბაიერნმა ლონდონელები ზედიზედ სამჯერ ანგარიშით 5:1 დაამარცხა. "მეთოფეების" ბოლო მოგება მიუნხენელებთან მოხდა 10 წლის წინ, მაშინ, როცა ინგლისურ კლუბში ჯერ კიდევ არსენ ვენგერი მუშაობდა.

ჩემპიონთა ლიგის ოთხშაბათის მატჩის დღე