მატჩის დღე - ჩემპიონთა ლიგა | ტურნირის ფავორიტები ერთმანეთის პირისპირ

ჩემპიონთა ლიგა ბრუნდება! ლიგის ფაზის მეოთხე ტურში გველის ორი მატჩი ტურნირის მთავარი ფავორიტების მონაწილეობით - მადრიდის რეალი ესტუმრება ლივერპულს, მიუნხენის ბაიერნი კი პარის სენ-ჟერმენს. განვიხილოთ ორივე შეხვედრა.

ლივერპული V რეალი

ნაცნობი მოწინააღმდეგეები, რომლებმაც ახლო წარსულში ერთმანეთში ითამაშეს ჩემპიონთა ლიგის ორი ფინალი და ორივე შემთხვევაში მოგებული რეალი გამოვიდა. ესპანური კლუბის დამრიგებლები იმ დროს იყვნენ კარლო ანჩელოტი და ზინედინ ზიდანი, ლივერპულის კი იურგენ კლოპი.

დღეს, მადრიდელთა მწვრთნელი არის მერსისაიდელებისთვის კარგად ნაცნობი ჩაბი ალონსო, ინგლისური გუნდის კი არნე სლოტი. ორივე გრანდში დაიწყო ახალი ერა და სეზონის სტარტზე უნდა ითქვას, რომ "სამეფო კლუბი" "წითლებზე" კარგ შთაბეჭდილებას ტოვებს. პრიმერა დივიზიონში ლიდერობა და წაუგებელი სერია ევროსარბიელზე, ბერნაბეუს ბინადრებმა სეზონი სწორედ ასე დაიწყეს.

ენფილდზე დამსწრე პუბლიკამ იხილა რამდენიმე მარცხი და საფეხბურთო სამყარო პრემიერ ლიგის მოქმედი ჩემპიონის კრიზისზე ალაპარაკდა. არსებობს მოსაზრება, რომ ნიდერლანდელი თავკაცი ვერ ახერხებს ახალი იდეების შემოტანასა და გუნდის ახალწვეულების ინტეგრირებას.

საუბარია იმ ფეხბურთელებზე, რომელშიც ლივერპულმა ზაფხულში 450 მილიონი გირვანქა სტერლინგი დახარჯა. ალონსოს გუნდთან მატჩი იქნება კარგი გამოცდა იმის გამოსავლენად, თუ რა პოტენციალი აქვთ რეალურად ამ ფორმაციის მერსისაიდელებს. მოედანზე იქნება გიორგი მამარდაშვილი, რომელმაც ჯერ კიდევ ვალენსიადან იცის, თუ რას ნიშნავს რეალის წინააღმდეგ თამაში.

პსჟ V ბაიერნი

ჩემპიონთა ლიგის მოქმედი გამარჯვებული გერმანული მანქანის წინააღმდეგ. ბაიერნი ბრწყინვალე ფორმაშია, რაზეც მეტყველებს ზედიზედ 15 მოგება სეზონის სტარტზე. მიუნხენური კლუბი კვლავ რჩება პარის სენ-ჟერმენისთვის ევროპაში ყველაზე უხერხულ მეტოქედ, იმის გათვალისწინებით, რომ საერთაშორისო ტურნირებზე ყველაზე მეტი, 8 წაგება სწორედ გერმანულ გუნდთან ფიქსირდება.

მსოფლიო საკლუბო ჩემპიონატზე "რეკორდმაისტერის" დამარცხებით პსჟ-მ ხასიათი უფრო გამოისწორა, თუმცა ჩემპიონთა ლიგა სულ სხვა განზომილებაა. მუნდიალზე მოგებას თუ არ ჩავთვლით, უშუალოდ ევროპის ყველაზე პრესტიჟულ საკლუბო ტურნირზე ალიანც არენას ბინადრებმა "ლურჯ-წითლებს" ბოლო 4/4 შეხვედრა მოუგეს.

ვნახოთ, შეძლებს თუ არა ლუის ენრიკეს გუნდი ნავსის გატეხვას. ჩემპიონთა ლიგის მოქმედი გამარჯვებულის რიგებში ითამაშებს ხვიჩა კვარაცხელია, რომელმაც ევროპის ყველაზე პრესტიჟულ საკლუბო ტურნირზე უკვე 2 ბურთი შეაგდო. ახალგაზრდა ვინგერმა ჯერ აიღო ბერგამოს ატალანტას კარი, შემდეგ კი ლევერკუზენის ბაიერის.

ჩემპიონთა ლიგის სამშაბათის მატჩის დღე