დღეს, 6 მაისს, ჩვენი დროით 23:00 საათზე გაიმართება ჩემპიონთა ლიგის ნახევარფინალის განმეორებითი მატჩი მილანის ინტერსა და ბარსელონას შორის. შეგახსენებთ, რომ პირველ შეხვედრაში დაფიქსირდა ფრე, 3:3. მიმოვიხილოთ ყველაფერი საინტერესო ამ წყვილის გარშემო.
ინტერი VS ბარსელონა (3:3) | 23:00
პირველ მატჩში მაყურებელმა იხილა ექვსგოლიანი თრილერი, რომელშიც იყო პრაქტიკულად ყველაფერი - ლამინ იამალმა ჩაატარა თავისი მე-100 შეხვედრა ბარსაში, თანაც სულ რაღაც 17 წლის ასაკში. მარკუს ტურამმა შეაგდო ყველაზე სწრაფი ბურთი ლიგის 1/2 ფინალების ისტორიაში, თანაც რა გოლი!
რაფინია ბელოლის დაუგროვდა 20 შედეგიანი ქმედება ჩემპიონთა ლიგის ერთ სეზონში (კრიშტიანუ რონალდუს რეკორდამდე მას ერთი შედეგიანი ქმედება აკლია). ეს იყო პირველი 3:3 ლიგის 1/2 ფინალში 1999 წლის შემდეგ, როდესაც მსგავსი შედეგი კიევის დინამომ და მიუნხენის ბაიერნმა დააფიქსირეს.
მატჩი საინტერესო მომენტებითა და ულამაზესი გოლებით იყო დატვირთული. შედეგად - ზედიზედ მეორე 3:3 კატალონიელებსა და ინტერს შორის, 2022 წლის შემდეგ. გამოსარჩევია ის ფაქტი, რომ მილანელთა დამრიგებელს, სიმონე ინძაგის "ბლაუგრანასთან" არასდროს წაუგია: 1 მოგება და 2 ფრე.
ვნახოთ, რა იქნება განმეორებით მატჩში. სტუმრად გატანილი გოლის პრინციპი რომ მოქმედებდეს, ფინალში გასვლის ფავორიტი ულაპარაკოდ იქნებოდა "ნერაძური", მაგრამ აღნიშნული წესის გარეშე, შანსები თანაბარია. შეგახსენებთ იმასაც, რომ ამ წყვილში მოგებული ფინალში პარის სენ-ჟერმენსა და ლონდონის არსენალს შორის ერთ-ერთს შეხვდება.
ბოლოს კი გუნდების დანაკლისის შესახებ. მონჟუიკის ბინადრებს დაუბრუნდათ რობერტ ლევანდოვსკი, თუმცა გამოაკლდათ ჟიულ კუნდე. ფრანგი განაპირა მცველის გარდა, ჰანსი ფლიკის განკარგულებაში არ იქნებიან ალეხანდრო ბალდე, მარკ კასადო, მარკ ბერნალი და პაბლო ტორე.
ინძაგის დაუბრუნდა ლაუტარო მარტინესი, თუმცა 100 პროცენტით მზად ის არ არის. პრესაში ასევე იწერებოდა ბენჟამინ პავარის გამოჯანმრთელების შესახებ, მაგრამ ბოლოს როგორც გაირკვა, არგენტინელი ფორვარდის მსგავსად, სრულფასოვნად მზად არც ის არის.
