ძველი ნაცნობები, უარყოფითი მოგონებები
ინტერნაციონალე და არსენალი ერთმანეთს შეხვედრილან ორჯერ - ერთხელ იმარჯვეს იტალიელებმა, ერთხელაც ინგლისელებმა. ეს ყველაფერი ხდებოდა ევროპის ყველაზე პრესტიჟული საკლუბო ტურნირის ჯგუფურ ეტაპზე, 2003/04 წლების სეზონში. პირველ მატჩში გამანადგურებელი ანგარიში დაფიქსირდა მილანელთა სასარგებლოდ, თანაც სტუმრად, 3:0.
მეორე შეხვედრაში კი გამანადგურებლების როლში აღმოჩნდნენ ლონდონელები - 5:1, ასევე გასვლაზე. თამაში, რომელშიც ტიერი ანრი უბრალოდ შეუჩერებელი იყო. ფრანგმა ფორვარდმა მიითვალა 2 ბურთი და 2 ასისტი. ალბათ შეგხვედრიათ ფოტო, რომელზეც ხავიერ ძანეტი და მარკო მატერაცი ვერ იყოფენ "მეთოფეთა" ლიდერის მაისურს, ეს ყველაფერი იმ 2-მატჩიან დუელში მოხდა.
იმის შემდეგ გავიდა 21 წელი და უნდა ითქვას, რომ ორივე გუნდმა აღმასვლასთან ერთად, არაერთი დაღმასვლაც განიცადა. "ნერაძურიმ" შემდეგი დეკადის დასაწყისში მოახერხა ევროპის ყველაზე პრესტიჟული საკლუბო ტურნირის მოგება, "კანონირებისთვის" კი ეს ტიტული აუღებელ მწვერვალად დარჩა. ყველაზე ახლოს არსენ ვენგერის გუნდი თასის მოგებასთან 2006 წელს იყო.
როგორც გვახსოვს, ჰაიბერის ბინადრები ფინალში ბარსელონასთან დამარცხდნენ. დავბრუნდეთ აწმყოში, სადაც თანამედროვე ფეხბურთთან ადაპტირება წარმატებით შეძლეს როგორც "გველებმა", ისე არსენალის ახალი თაობის წარმომადგენლებმაც. იტალიურმა კლუბმა სკუდეტო ბოლო წლებში მოიგო 2-ჯერ, ლონდონელები კი ნისლიან ალბიონზე მუდმივად მანჩესტერ სიტის მახლობლად ტრიალებენ.
ისიც სათქმელია, რომ "ქალაქელების" დაჩრდილვას ჯერჯერობით ვერ ახერხებენ "მეთოფეები", თუმცა ამ გუნდის პროგრესი აშკარაა. ჯუზეპე მეაცას ბინადრების, ისევე როგორც "კანონირების" წარმატების საიდუმლო იმალება დამრიგებლებში: სიმონე ინძაგისა და მიკელ არტეტაში. ორივე მათგანი სისტემური ფეხბურთის მოყვარულია.
იტალიელმა მწვრთნელმა თავის ამჟამინდელ გუნდში წარმატებით მოახდინა ანტონიო კონტეს დატოვებული იდეების განვითარება, მისმა ესპანელმა კოლეგამ კი პეპ გუარდიოლას ფრთის ქვეშ დაგროვილი თეორიული გამოცდილების პრაქტიკაში გამოიყენა. ვნახოთ, რას შემოგვთავაზებს ინტერი და არტეტას გუნდი დღეს.
სხვა მატჩები:
მილანელებისა და ემირეითსის ბინადრების დაპირისპირების გარდა, ოთხშაბათის მატჩის დღეს კიდევ რვა შეხვედრა გაიმართება. გამოსარჩევია პარის სენ-ჟერმენისა და ატლეტიკოს დუელი: დიეგო სიმეონე ლუის ენრიკეს წინააღმდეგ, ანტუან გრიზმანი - ოსმან დემბელე, იან ობლაკი - ჯიჯო დონარუმა, ერთი სიტყვით, ბევრი საინტერესო გველოდება.
მიუნხენის ბაიერნი მიიღებს ლისაბონის ბენფიკას, შესანიშნავ ფორმაში მყოფი ბარსელონა კი ბელგრადში ცრვენა ზვეზდას ესტუმრება. არ უნდა დაგვავიწყდეს ირაკლი აზაროვის შახტარიც, რომელიც იანგ ბოიზს მიიღებს.
ჩემპიონთა ლიგის ოთხშაბათის ყველა მატჩი:
21:45 - ბრიუგე-ასტონ ვილა
21:45 - შახტარი-იანგ ბოიზი
23:55 - ინტერი-არსენალი
23:55 - პსჟ-ატლეტიკო
23:55 - ბაიერნი-ბენფიკა
23:55 - ცრვენა ზვეზდა-ბარსელონა
23:55 - შტუტგარტი-ატალანტა
23:55 - ფეიენოორდი-ზალცბურგი
23:55 - სპარტა-ბრესტი
