დღეს, ჩვენი დროით 17:00 საათზე გაიმართება სერია ა-ს 34-ე ტურის ცენტრალური დაპირისპირება - მილანის ინტერი საკუთარ კედლებში რომას მიიღებს. განვიხილოთ, თუ რა ხდება "ნერაძურისა" და დედაქალაქელების გარშემო.
ინტერი - გადატვირთული გრაფიკი, საკადრო პრობლემები
ერთი კვირის წინ, ინტერნაციონალე ინარჩუნებდა ტრებლის მოგების შანსს - ლიდერობა სერია ა-ში, ჩემპიონთა ლიგის ნახევარფინალი და იტალიის თასის ფინალი. სიტუაცია რადიკალურად შეიცვალა: ბოლონიასთან წაგების შემდეგ, მილანელებს ქულებით გაუთანაბრდა ნაპოლი და ახლა კალჩოში ორხელისუფლებიანობაა.
რაც შეეხება კოპა იტალიას ფინალს, "ნერაძური" თანაქალაქელ მილანთან დამარცხა. რამდენიმე დღეში არის ნახევარფინალი ბარსელონასთან, მაგრამ იქამდე, მეაცას ბინადრებს ელით ურთულესი შეხვედრა რომასთან. მოქმედი ჩემპიონის მდგომარეობას გადატვირთულ გრაფიკთან ერთად, საკადრო პრობლემებიც ამძიმებს.
სიმონე ინძაგი დღევანდელ მატჩში დისკვალიფიკაციის გამო ვერ გამოიყენებს ჰენრიხ მხითარიანსა და ალესანდრო ბასტონის. ამის გარდა, ტრავმების გამო ინტერს ვერ დაეხმარებიან დენზელ დუმფრისი, მარკუს ტურამი, პიოტრ ჟიელინსკი და ვალენტინ კარბონი.
დაუმარცხებელი რომა
სეზონის კატასტროფულად დაწყების, დანიელე დე როსისა და ივან ჯურიჩის გაშვების შემდეგ, რომას მხსნელად კლაუდიო რანიერი მოევლინა. "ჯალოროსი" იმ მომენტისთვის გაჭედილი იყო სატურნირო ცხრილის ქვედა ნაწილში, მაგრამ ახლა ეს გუნდი ჩემპიონთა ლიგის საგზურის მოპოვების რეალური პრეტენდენტია.
"მგლები" მეოთხე ადგილზე მყოფ ბოლონიას სულ რაღაც სამი ქულით ჩამორჩებიან. აღსანიშნავია ისიც, რომ 2025 წელს, სერია ა-ში დედაქალაქურ გუნდს არ წაუგია. რანიერის შეგირდების ბოლო მარცხი თარიღდება გასული წლის 15 დეკემბრით და იმის შემდეგ, ისინი 17 ტურის განმავლობაში დაუმარცხებლები არიან.
კვირის ყველა გამორჩეული მატჩი
| დრო | მატჩი | ტურნირი |
| 14:30 | ვენეცია - მილანი | სერია ა |
| 17:00 | ინტერი - რომა | სერია ა |
| 17:00 | ბორნმუთი - მანჩესტერ იუნაიტედი | პრემიერ ლიგა |
| 17:00 | ფიორენტინა - ემპოლი | სერია ა |
| 19:30 | ლივერპული - ტოტენჰემი | პრემიერ ლიგა |
| 19:30 | ნოტინგემი - მანჩესტერ სიტი | ასოციაციის თასი |
| 20:00 | იუვენტუსი - მონცა | სერია ა |
| 22:45 | ნაპოლი - ტორინო | სერია ა |
