დღეს, 16 სექტემბერს ჩემპიონთა ლიგის 2025/2026 წლების სეზონი ოფიციალურად სტარტს აიღებს. ლიგის ფაზის თითოეულ ტურში იქნება 18 შეხვედრა, რომელიც თანაბრად იქნება გადანაწილებული ორ დღეზე, მაგრამ პირველ ტურში გვხვდება გამონაკლისი: 6-6 თამაში სამი დღის მანძილზე.
გიორგი მიქაუტაძის დებიუტი ჩემპიონთა ლიგაზე
პირველ დღეს ქართველი გულშემატკივრისთვის ყველაზე საინტერესო მოვლენა იქნება მიქაუტაძის დებიუტი ჩემპიონთა ლიგაზე. ვილიარეალის ახალწვეულმა ფორვარდმა უკვე მოასწრო 1 შეხვედრის ჩატარება პრიმერა დივიზიონში, მადრიდის ატლეტიკოს წინააღმდეგ, წინ კი ევროსარბიელია, სადაც პირველი მეტოქე ლონდონში ტოტენჰემი იქნება.
ჟორჟს არასდროს უთამაშია "დეზებთან", ზოგადად პრემიერ ლიგიდან კი მას მანჩესტერ იუნაიტედის ფეხბურთელებთან ბრძოლის გამოცდილება აქვს. ეს მოხდა ევროპა ლიგის გასული სეზონის 1/4 ფინალში, რომელშიც ლიონმა "წითელ ეშმაკებთან" დრამატულ დუელში 2 შეხვედრის ჯამში 6:7 წააგო.
"ლომების" ყოფილმა თავდამსხმელმა იმ დაპირისპირებაში საკუთარ ანგარიშზე ერთი საგოლე გადაცემა მიითვალა. ვნახოთ, რას იზამს ის ამჯერად ჰოტსპურ სთეიდიუმის ბინადრების წინააღმდეგ. საინტერესოა, რომ "ყვითლების" მე-9 ნომრის ერთ-ერთი მეტოქე მოედანზე დღეს მოჰამედ კუდუსი იქნება.
საუბარია თავდამსხმელზე, რომელიც 24 წლის შემტევს ამსტერდამის აიაქსში უნდა შეეცვალა. დიახ, 2023 წლის 27 აგვისტოს ნიდერლანდურმა კლუბმა განელი ფორვარდი 43 მილიონად გაყიდა ლონდონის ვესტ ჰემში, 3 დღის შემდეგ კი მეციდან მიქაუტაძე გაიფორმა. დღეს, ისინი ტომას ფრანკის გუნდისა და "სუბმარინას" მოთამაშეების რანგში უპირისპირდებიან ერთმანეთს.
ჩემპიონთა ლიგის მატჩის დღის ყველა დაპირისპირება
| დრო | მატჩი |
| 20:45 | ბილბაო - არსენალი |
| 20:45 | პსვ - სენტ ჟილი |
| 23:00 | იუვენტუსი - დორტმუნდი |
| 23:00 | რეალი - მარსელი |
| 23:00 | ტოტენჰემი - ვილიარეალი |
| 23:00 | ბენფიკა - ყარაბაღი |
