სანაკრებო შესვენება დასრულდა, რაც ნიშნავს იმას, რომ საკლუბო ფეხბურთი დაგვიბრუნდა. შაბათის მატჩის დღე გვიმზადებს არაერთ საინტერესო დაპირისპირებას, მათ შორის იტალიურ დერბისა და მადრიდის ატლეტიკო - ვილიარეალის დუელს, რომელშიც გიორგი მიქაუტაძის დებიუტი უნდა შედგეს.
იტალიური დერბი
სერია ა-ს მიმდინარე სეზონის პირველი დიდი მატჩი გაიმართება ტურინში, სადაც იუვენტუსი მილანის ინტერს მიიღებს. იტალიის ჩემპიონატის პირველმა 2-მა ტურმა აჩვენა, რომ "ბიანკონერი" ახალ სეზონს "ნერაძურიზე" უკეთეს ფორმაში შეხვდა. მასპინძლებმა მოუგეს პარმასა და ჯენოას, მეაცას ბინადრებმა კი გაანადგურს ტორინო, მაგრამ შემდეგ, უდინეზესთან წააგეს.
რაც შეეხება დერბი დელა იტალიას ისტორიულ ნაწილს, ეს იქნება რიგით 241-ე დაპირისპირება და წინა შედეგები ასეთია - 110-ჯერ იმარჯვეს ალიანს სთეიდიუმის ბინადრებმა, 70-ჯერ მოიგო ინტერნაციონალემ, 60 შეხვედრა კი ფრედ დასრულდა. საინტერესო იქნება სპეციალისტთა დუელიც: კრისტიან კივუ იგორ ტუდორის წინააღმდეგ.
წარსულში ორივე მწვრთნელი მცველების ამპლუაში იუვენტუსისა და მილანური გუნდის ფეხბურთელები იყვნენ. გასულ სეზონში ისინი ერთმანეთს შეხვდნენ სპეციალისტების რანგშიც და უნდა ითქვას, რომ რუმინელი დამრიგებლის პარმამ ტურინულ კლუბს მოუგო. ვნახოთ, რა იქნება იტალიურ დერბიში.
გიორგი მიქაუტაძის დებიუტის მოლოდინში ლა ლიგაში
მიქაუტაძე ვილიარეალში ლიონის ოლიმპიკიდან გადავიდა 40 მილიონი ევროს სანაცვლოდ, რითაც ის გახდა ყველაზე ძვირადღირებული მოთამაშე ესპანური კლუბის ისტორიაში. "ყვითლების" უახლოესი მეტოქე იქნება ატლეტიკო, რომელმაც სეზონი დაიწყო წარუმატებლად: 3 ტურის შემდეგ, მხოლოდ 2 ქულა.
ვნახოთ, შეძლებს თუ არა მადრიდული გუნდი ლა ლიგის მიმდინარე სეზონში პირველი გამარჯვების მოპოვებას. ამით არ სრულდება ქართველი ფორვარდის დატვირთული გრაფიკი და "როხიბლანკოსთან" შეხვედრიდან 3 დღის შემდეგ, "სუბმარინას" ელის კიდევ ერთი გასვლითი შეხვედრა, ამჯერად ტოტენჰემთან, ევროსარბიელზე.
შაბათის ყველა გამორჩეული მატჩი
| დრო | მატჩი | ტურნირი |
| 15:00 | კარლსრუე - ნიურნბერგი | მე-2 ბუნდესლიგა |
| 15:30 | არსენალი - ნოტინგემი | პრემიერ ლიგა |
| 17:00 | პადოვა - ფროზინონე | სერია ბ |
| 17:30 | ჰაიდენჰაიმი - დორტმუნდი | ბუნდესლიგა |
| 18:15 | რეალ სოსიედადი - რეალ მადრიდი | ლა ლიგა |
| 18:15 | კადისი - ეიბარი | ლა ლიგა 2 |
| 20:00 | იუვენტუსი - ინტერი | სერია ა |
| 20:30 | ბაიერნი - ჰამბურგი | ბუნდესლიგა |
| 22:00 | კლერმონი - სენტ-ეტიენი | ლა ლიგა 2 |
| 22:45 | ფიორენტინა - ნაპოლი | სერია ა |
| 23:00 | ატლეტიკო - ვილიარეალი | ლა ლიგა |
| 23:00 | ბრენტფორდი - ჩელსი | პრემიერ ლიგა |
| 23:30 | ფამალიკაო - სპორტინგი | პრიმეირა ლიგა |
| 03:30 | ატლანტა - კოლუმბუსი | MLS |
