დღეს გაიმართება კონფერენს ლიგის საკვალიფიკაციო ეტაპის შეხვედრები, სადაც ერთბაშად 3 ქართული კლუბი იასპარეზებს.
სამწუხაროდ, საკვალიფიკაციო ეტაპზე გუშინ იბერიამ ლევადიასთან 1:0 წააგო. უკეთესი შედეგების დაფიქსირებას დღეს სხვა სპაერი, დილა და ტორპედო შეეცდებიან.
რიგა - გორის დილა
როგორც მოსალოდნელი იყო, დილამ პირველ ეტაპზე ლუქსემბურგის რასინგის ბარიერი გადალახა, თან ისე, რომ გუნდმა კარგი ფეხბურთი ითამაშა, მომენტები შექმნა და შემდეგ ეტაპზე გასვლა დაიმსახურა. მომდევნო ეტაპზე დილას გაცილებით რთული მეტოქე ჰყავს. რიგა ლატვიის ჩემპიონატის ლიდერია, საოცარ ფორმაშია და 29 მარტის შემდეგ თამაში არ წაუგია. განსაკუთრებით კარგად ისინი საკუთარ მოედანზე თამაშობენ.
გორელები შეეცდებიან, რომ სტუმრადაც შემტევი ფეხბურთი ითამაშონ და მეტოქეს თავიანთი თამაში მოახვიონ თავს. დილას საფირმო სტილი სწორედ შეტევითი ფეხბურთის თამშია. რიგასა და დილას შეხვედრა 21:00 საათზეა ჩანიშნული.
აუსტრია - სპაერი
ისტორიაში პირველად, საქართველოს თასის გამარჯვებული სპაერი ევროტურნირებზე თამაშობს. სამწუხაროდ, მათ არ გაუმართლათ და პირდაპირ ვენის აუსტრიას შეხვდნენ. იმ აუსტრიას, რომელიც რამდენიმე თვის წინ ძალიან ახლოს იყო ავსტრიის ჩემპიონობასთან და ავსტრიულ გრანდებს დიდი კონკურენცია გაუწია.
როგორც სპაერის მთავარმა მწვრთნელმა ანზორ კიღურაძემ აღნიშნა, გუნდურობის ხარჯზე სპაერი სასურველი მიზნის მიღწევას შეეცდება. მითუმეტეს, სპაერს დასაკარგი არაფერი აქვს და გაცილებით თავისუფლად შეუძლიათ თამაში. მატჩი 20:30 საათზე დაიწყება
ომონია - ტორპედო
ტორპედომ ორდაბასის ბარიერი მძიმე და დაძაბულ ბრძოლაში დაძლია, მეორე ეტაპზე კი მეტოქე გაცილებით ძლიერია. ომონია კვიპროსის ერთ-ერთი გამორჩეული კლუბია, თუმცა ბოლო დროს სასურველ ფორმაში არ არიან და რამდენიმე დღის წინ, ამხანაგური მატჩი ოლიმპიაკოს ნიქოზიასთან წააგეს.
შეგახსენებთ, რომ ერთი წლის წინ ტორპედო ასპარეზობას სწორედ ომონიამ გამოთიშა. ქუთაისელებს ორმაგი მოტივაცია აქვთ, რომ რევანში აიღონ და შემდეგ ეტაპზე გავიდნენ. სამწუხაროდ, ამ მნიშვნელოვან მატჩს საბა კვერკველია გამოტოვებს, რომელსაც დისკვალიფიკაცია აქვს. დანარჩენი ყველა ფეხბურთელი მზადყოფნაშია. შეხვედრა 21:00 საათზე დაიწყება.
