პრემიერ ლიგა
დღეს, პრემიერ ლიგაში შედგება რუბენ ამორიმის დებიუტი მანჩესტერ იუნაიტედის მთავარი მწვრთნელის რანგში. შეგახსენებთ, რომ ერიკ ტენ ჰაგის გათავისუფლების შემდეგ, "წითელ ეშმაკებთან" დროებით მუშაობდა რუდ ვან ნისტელროი, 11 ნოემბრიდან კი დამრიგებლის პოსტზე უკვე პორტუგალიელი მივიდა.
"მანკუნიანელების" მოწინააღმდეგე იფსვიჩ თაუნი იქნება. დღეს ასევე თავის შეხვედრას ჩაატარებს პრემიერ ლიგის ლიდერი ლივერპული, რომელიც საუთჰემპტონს ესტუმრება. როგორც ვიცით, მანჩესტერ სიტი განადგურდა ტოტენჰემთან და "წითლების" მოგების შემთხვევაში, მოქმედ ჩემპიონთან სხვაობა 8 ქულამდე გაიზრდება.
18:00 - საუთჰემპტონი-ლივერპული
20:30 - იფსვიჩი-მანჩესტერ იუნაიტედი
ლა ლიგა
ლა ლიგის მე-14 ტურის დარჩენილ შეხვედრებში პირველ რიგში გამოსარჩევია მადრიდის რეალის სტუმრობა მეზობელ ლეგანესთან. ბარსელონასა და მილანთან წაგების შემდეგ, "სამეფო კლუბი" ქომაგების თვალში რეაბილიტირებას ცდილობს. სანაკრებო პაუზამდე, განადგურებული პამპლონის ოსასუნა იქნა.
ვნახოთ, რას იზამს "ბლანკოსი" "ლოს პეპინეროსთან". ასევე გამოსარჩევია ტურის დასკვნითი შეხვედრა, ბასკური დერბი: ბილბაოს ატლეტიკი - სან სებასტიანის სოსიედადი. მეზობლებს შორის სხვაობა სულ რაღაც 2 ქულა არის. "თეთრ-წითლები" 20 ქულით არიან 8 პოზიციაზე, ორი ადგილით ქვემოთ კი "თეთრ-ლურჯები".
17:00 - ოსასუნა-ვილიარეალი
19:15 - სევილია-რაიო ვალეკანო
21:30 - ლეგანესი-რეალი
23:55 - ბილბაო-სოსიედადი
სერია ა
კვირის მატჩის დღის ცენტრალური შეხვედრა: ნაპოლი - რომა. კლაუდიო რანიერი ანტონიო კონტეს წინააღმდეგ, რომელუ ლუკაკუ კი თავისი ყოფილი თანაგუნდელების პირისპირ. ცხადია, ყურადღების ცენტრში იქნება ხვიჩა კვარაცხელია, რომელსაც "ჯალოროსისთან" გაკეთებული აქვს 2 ასისტი, მაგრამ გოლის გატანა მან ჯერჯერობით ვერ შეძლო.
ვნახოთ, გატყდება თუ არა ნავსი ამჯერად. აღსანიშნავია ისიც, რომ ქართველ გარემარბს მშობლიურ სტადიონზე გოლი ორი თვის მანძილზე არ გაუტანია. ერთი სიტყვით, "პარტენოპეის" ლიდერის გაბრწყინების დროა. ადგილობრივი პრესა წერს, რომ გამოცდილი იტალიელი სპეციალისტი მის წინააღმდეგ ერთგვარ გალიას ამზადებს.
23 წლის გარემარბი "მგლების" მცველების გაძლიერებული კონტროლის ქვეშ იქნება. პირველი ადგილის შესანარჩუნებლად, "სამხრეთელებს" გამარჯვება სჭირდებათ ჰაერივით, რადგან მილანის ინტერმა და ბერგამოს ატალანტამ თავისი მატჩები მოიგეს. ორივე გუნდმა უკვე გადაასწრო "აძურის" და ვნახოთ, პასუხი როგორი იქნება.
15:30 - ჯენოა-კალიარი
18:00 - კომო-ფიორენტინა
18:00 - ტორინო-მონცა
21:00 - ნაპოლი-რომა
23:45 - ლაციო-ბოლონია
ლეგიონერები
შესაძლებელი იყო, რომ სერია ბ-ში გვეხილა ქართული დერბი - ლუკა ლოჩოშვილი გიორგი კვერნაძის წინააღმდეგ, თუმცა პირველი მათგანი შეხვედრას გასულ ტურში მიღებული წითელი ბარათის გამო ტოვებს. აქედან გამომდინარე, კრემონეზესა და ფროზინონეს მატჩი ქართველი უკანახაზელის გარეშე ჩაივლის.
საინტერესო შეხვედრა გაიმართება ავსტრიის ბუნდესლიგაში, სადაც სანდრო ალთუნაშვილის ვოლფსბერგერი რაინდორფ ალტაჰს მიიღებს. ასევე გამოსარჩევია გიორგი გოჩოლეიშვილის კოპენჰაგენის მატჩი ლიუნგბიუსთან. შვეიცარიის ჩემპიონატის გასულ ტურში, მოედანზე გამოჩნდა გაბრიელ სიგუა, რომელიც რამდენიმე თვის მანძილზე ლაზარეთში იმყოფებოდა.
ქართველი ცენტრალური ნახევარმცველი ჯერდან შაქირის ნაცვლად შემოვიდა. დღეს, მისი ბაზელი სერვეტს მიიღებს. ასევე გამოსარჩევია ატლანტა იუნაიტედის სტუმრობა ორლანდოსთან, MLS-ის პლეიოფში. შეგახსენებთ, რომ იქამდე, საბა ლობჟანიძის გუნდმა მოქმედ ჩემპიონს, ინტერ მაიამის მოუგო.
17:30 - ვოლფსბერგერი-ალტაჰი
18:00 - საუთჰემპტონი-ლივერპული
18:00 - კრემონეზე-ფროზინონე
19:30 - ბაზელი-სერვეტი
20:30 - იფსვიჩი-მანჩესტერ იუნაიტედი
21:00 - ნაპოლი-რომა
21:00 - კოპენჰაგენი-ლიუნგბიუ
21:30 - ლეგანესი-რეალი
00:30 - ორლანდო-ატლანტა
