![[მატჩის დღე] კვარაცხელიას მორიგი შოუს მოლოდინში და შაბათის სხვა გამორჩეული შეხვედრები](/_next/image?url=https%3A%2F%2Flagazzetta-uploads.s3.us-east-1.amazonaws.com%2Fuploads%2Fposts%2FE17XCycLo0nptgqXCSeAyNg4td5kn6UM.webp&w=3840&q=75)
პრემიერ ლიგა
დღეს პრემიერ ლიგაში ჩემპიონატის მთავარი ფავორიტები ითამაშებენ - არსენალი მიიღებს ბრაიტონს, მანჩესტერ სიტი კი ვესტ ჰემს ესტუმრება. შეგახსენებთ, ზაფხულის სატრანსფერო ფანჯრის ბოლო დღეს, "მეთოფეებმა" მეზობელი ჩელსიდან რაჰიმ სტერლინგი გადმოიბირეს. "ქალაქელები" არ აქტიურობდნენ ბაზარზე, ილქაი გიუნდოგანის დაბრუნების შემდეგ, მოქმედ ჩემპიონებს არავინ დაუმატებიათ.
ლა ლიგა
გიორგი მამარდაშვილი ბრწყინვალე ფორმაშია, რასაც ვერ ვიტყვით ზოგადად ვალენსიაზე. ლა ლიგაში ჩატარებული სამი ტურის შემდეგ, ეს გუნდი ნული ქულით ბოლო ადგილზეა. დღეს, "ღამურების" მეტოქე მეზობელი ვილიარეალი იქნება. 3/3 მოგების მქონე ბარსელონა სახლში მიიღებს ვალიადოლიდს, ასევე, გამოსარჩევია მადრიდის ატლეტიკოს სტუმრობა ბილბაოს ატლეტიკთან.
სერია ა
გასულ ტურში ვიხილეთ, როგორი მრისხანე შეიძლება იყოს ანტონიო კონტეს ნაპოლი მიმდინარე სეზონში. ამას მოწმობს 3:0 ბოლონიასთან, რომლის მთავარი გმირი ხვიჩა კვარაცხელია იყო. ქართველმა ჯერ ულამაზესი ასისტი გააკეთა, შემდეგ კი თავადაც გაიტანა გოლი. დღევანდელ მატჩში შეტევაში მას ახალი მეწყვილე, რომელუ ლუკაკუ ეყოლება.
იტალიელმა მწვრთნელმა მაინც მოახერხა იმ თავდამსხმელის გადმობირება, რომელთან ერთადაც მილანის ინტერში სკუდეტო მოიპოვა. ვნახოთ, როგორ გაუმკლავდება "პარტენოპეის" ახალი შეტევა პარმას. კალჩოში ასევე გამოსარჩევია უმძიმესი სტარტის მქონე მილანის სტუმრობა რომში, ლაციოსთან.
ბუნდესლიგა
ბუნდესლიგის პირველ ტურში ლევერკუზენის ბაიერმა არ უღალატა ტრადიციას და გამარჯვება უკანასკნელ წუთებზე მოიპოვა. დღეს, მოქმედი ჩემპიონების მეტოქე ლაიფციგი იქნება. რამდენიმე საათით ადრე, დორტმუნდის ბორუსია ბრემენის ვერდერს ესტუმრება.
ლიგა 1
ლიგა 1-ში ჩვენთვის ყველაზე საინტერესო შეხვედრა ბრესტსა და სენტ-ეტიენს შორის გაიმართება. როგორც ვიცით, სტუმრების შემადგენლობაში ზურიკო დავითაშვილი თამაშობს, რომელიც ნელ-ნელა ალღოს უღებს საფრანგეთის უმაღლეს დივიზიონს. თავისი მატჩი უკვე ჩაატარა ჟორჟ მიქაუტაძემ, რომლის ლიონმა 4:3 მოუგო სტრასბურგს, თავად ფორვარდმა მხოლოდ 59 წუთი ითამაშა.
ლეგიონერები
კვარაცხელიას, მამარდაშვილისა და დავითაშვილის გარდა, დღეს თავიანთ შეხვედრებს კიდევ რამდენიმე ლეგიონერი ჩაატარებს. გიორგი არაბიძის ულსანი მიიღებს პოჰანგს, საბა საზონოვისა და საბა გოგლიჩიძის ემპოლი კი ბოლონიას ესტუმრება. როგორც ვიცით, ქართველი უკანახაზელი ტორინოდან სწორედ "აძურიში" გადავიდა.
გიორგი ლორიას ომინია ესტუმრება აელს, ოთარ კიტეიშვილი კი შტურმთან ერთად ტიროლს მიიღებს. კრაკოვია თავის კაპიტანთან, ოთარ კაკაბაძესთან ერთად ესტუმრება რადომიაკს, ანზორ მექვაბიშვილის კრაიოვა კი რაპის მიიღებს. დღეს, მოედანზე გამოვა საქართველოს ეროვნული გუნდის კიდევ ერთი კარის დარაჯი, ლუკა გუგეშაშვილიც, რომლის პანსერაიკოსი პანაიტოლიკოსს ესტუმრება. მატჩების სრული განრიგი შეგიძლიათ იხილოთ ქვემოთ.
14:00 - ულსანი-პოჰანგი
15:30 - არსენალი-ბრაიტონი
17:30 - ვერდერი-დორტმუნდი
19:00 - ბარსელონა-ვალიადოლიდი
19:00 - ბრესტი-სენტ ეტიენი
20:30 - ვესტ ჰემი-მანჩესტერ სიტი
20:30 - ლევერკუზენი-ლაიფციგი
20:30 - ბოლონია-ემპოლი
21:00 - ბილბაო-ატლეტიკო
21:30 - შტურმი-ტიროლი
22:15 - რადომიაკი-კრაკოვია
22:30 - კრაიოვა-რაპიდი
22:45 - ლაციო-მილანი
22:45 - ნაპოლი-პარმა
23:30 - ვალენსია-ვილიარეალი
