მატჩის დღე: ლივერპულის უხერხული მეტოქე, კვარას ფაქტორი და წარსულის ფინალები

ჩემპიონთა ლიგის ფაზის პირველი ტური დღეს გაგრძელდება კიდევ ექვსი მატჩით - ყურადღების ცენტრში მყოფი ლივერპული მიიღებს მადრიდის ატლეტიკოს, ასევე განმეორდება ლიგის 2012 წლის ფინალი: მიუნხენის ბაიერნი - ლონდონის ჩელსი. შეგახსენებთ იმასაც, რომ დღეს, ითამაშებს მოქმედი ჩემპიონიც, ხვიჩა კვარაცხელიას პარის სენ-ჟერმენი.

ლივერპული V ატლეტიკო

სატრანსფერო ბაზარზე ფურორის მოხდენის შემდეგ, ლივერპულს დაუგროვდა ოთხიდან ოთხი გამარჯვება პრემიერ ლიგაში, დღეს კი ინგლისის მოქმედი ჩემპიონი მთავარ საკლუბო ტურნირზეც შეაბიჯებს. მერსისაიდელთა მეტოქე იქნება ატლეტიკო, რომელმაც გასულ უიკენდზე გიორგი მიქაუტაძის ვილიარეალის დამარცხებით, სეზონში პირველი მოგება მოიპოვა.

უნდა ითქვას, რომ "წითლებისთვის" მადრიდული გუნდი არის ერთ-ერთი ყველაზე უხერხული მოწინააღმდეგე - რვა მატჩი, სამჯერ იმარჯვეს ენფილდის ბინადრებმა, ასევე სამჯერ მოიგო "როხიბლანკომ", ორი თამაში ფრედ დასრულდა. ინგლისურ გუნდს აღნიშნულ მეტოქესთან სხვადასხვა დროს წაუგია ჩემპიონთა ლიგის 1/8 ფინალში და ასევე ევროპა ლიგის 1/2 ფინალშიც.

მოჰამედ სალაჰი არის ერთადერთი ფეხბურთელი ლივერპულის ისტორიაში, რომელმაც დიეგო სიმეონეს გუნდს ერთზე მეტი გოლი გაუტანა. მეტროპოლიტანოს ბინადრების მხრიდან კი გვხვდება 3 მოთამაშე, რომელმაც მერსისაიდელებს 1-ზე მეტი ბურთი შეუგდო. ესენი არიან: დიეგო ფორლანი, ანტუან გრიზმანი და მარკოს ლორენტე.

ითამაშებს თუ არა ხვიჩა კვარაცხელია ატალანტას წინააღმდეგ?

როგორც აღვნიშნეთ, დღეს გათამაშებაში ერთვება მოქმედი ჩემპიონი პარის სენ-ჟერმენიც, რომლის მოწინააღმდეგე ატალანტა იქნება. მასპინძლებს არ ეყოლებათ უსმან დემბელე და დეზირე დუე, ამის გარდა, კითხვის ნიშნის ქვეშ კვარას თამაშიც დგას. როგორც გვახსოვს, ლანსთან შეხვედრაში ქართველმა ვინგერმა მიიღო დაზიანება და მოედანი 30-ე წუთზე დატოვა.

ლუის ენრიკეს ჰკითხეს ხვიჩას კონდიციების შესახებ, თუმცა მწვრთნელმა გადაჭრით ვერ თქვა, იქნება თუ არა მზად მისი შეგირდი ბერგამასკებისთვის. აქვე დავამატებთ იმასაც, რომ პსჟ-ს ვინგერმა ნაპოლიში თამაშის დროს აღნიშნულ გუნდს 3 შეხვედრაში 2 ბურთი შეუგდო.

ჩემპიონთა ლიგის მატჩის დღის ყველა დაპირისპირება