[მატჩის დღე] მამარდაშვილი ბარსელონას წინააღმდეგ და შაბათის სხვა გამორჩეული შეხვედრები

საკლუბო სეზონი გაიხსნა! დღეს, არაერთი საინტერესო შეხვედრა გველის, როგორც ევროპის ტოპ 5 ლიგაში, ისე ქართველი ლეგიონერების თვალსაზრისითაც. განვიხილოთ ყველაზე გამორჩეული დაპირისპირება.

პრემიერ ლიგა

პრემიერ ლიგა უკვე დაიწყო, წუხელ თავის შეხვედრაში გამარჯვება მოიპოვა მანჩესტერ იუნაიტედმა, დღეს კი საქმეში ერთვებიან ლივერპული, ლონდონის არსენალი და სხვები. "წითლები" ჩემპიონშიფიდან აღზევებულ იფსვიჩს ესტუმრება, გასული სეზონის ვიცეჩემპიონები კი ვულვერჰემპტონს მიიღებენ. ასევე, გამოსარჩევია ასტონ ვილას სტუმრობა ვესტ ჰემთან.

ლა ლიგა

ლა ლიგაში პირველი ტურის ოთხი შეხვედრა უკვე გაიმართა. ცენტრალური შეხვედრა კი ვალენსიაში არის ჩანიშნული, სადაც თავის პირველ თამაშს ბარსელონა გამართავს. "ღამურების" მხრიდან ყურადღების ცენტრშია გიორგი მამარდაშვილი, რომლის სახელს ამ ეტაპზე ლივერპულს აქტიურად უკავშირებენ. ახალგაზრდა კარის დარაჯი, ჯერჯერობით, "ლოს ჩესშია" და ის კატალონიელებთან მატჩში ძირითად შემადგენლობაში იქნება.

ცხადია, საფეხბურთო სამყაროს ყურადღების ცენტრში იქნება "ბლაუგრანაც", რომელშიც ჰანს-დიტერ ფლიკის მოსვლის შემდეგ, ახალი ერა დაიწყო. კლუბში კვლავ არის მოთამაშეების რეგისტრაციასთან დაკავშირებული პრობლემები, რის გამოც "მურსელაგოსთან" მატჩს გამოტოვებს "ლურჯ-ბროწეულისფრების" ახალწვეული, დანი ოლმო.

სერია ა

სტარტს იღებს სერია ა-ც, თანაც ოთხი შეხვედრით. დღეს, საქმეში თანაქალაქელი ინტერნაციონალე და მილანი ერთვებიან. სკუდეტოს მოქმედი ტრიუმფატორები ჯენოას ესტუმრებიან, "როსონერი" კი ტორინოს მიიღებს, რომლის რიგებში საბა საზონოვი ირიცხება. ასევე, გამოსარჩევია პარმასა და ფლორენციის ფიორენტინას მატჩი, გუნდები, რომლებიც ერთ დროს კალჩოში მაღალი მიზნებისთვის იბრძოდნენ.

ლიგა 1

მთავარი შეხვედრა ქართველი გულშემატივრებისთვის: მონაკო - სენტ-ეტიენი. ლიგა 1-ის ერთ დროს ყველაზე ტიტულოვანი გუნდი საფრანგეთის ელიტაში დაბრუნდა და თანაც, ზურიკო დავითაშვილიც გაიფორმა. ახალგაზრდა ვინგერმა პრესეზონზე ძალიან კარგი შთაბეჭდილება დატოვა, რაც მოედანზე პირველივე წუთებიდან მის გამოჩენის შანსებს მნიშვნელოვნად ზრდის.

გერმანიის სუპერთასი

გერმანიაში სეზონი სათასო დაპირისპირებებით გაიხსნა, დღეს კი გაიმართება სუპერთასი, ლევერკუზენის ბაიერსა და შტუტგარტს შორის. ჩაბი ალონსოს შანსი ეძლევა სეზონი ტიტულის მოგებით დაიწყოს. ცხადია, "ფარმაცევტები" ვერცხლის სინისთვის ბრძოლაშიც იქნებიან ფავორიტები, მიუნხენის ბაიერნთან ერთად.

ლეგიონერები

მამარდაშვილისა და დავითაშვილის გარდა, დღეს, საქართველოს ნაკრების კიდევ რამდენიმე წევრი ითამაშებს. გიორგი ჩაკვეტაძის უოტფორდი მიიღებს სტოკს, ოთარ კიტეიშვილის შტურმ გრაცი ესტუმრება კლაგენფურტს, ოთარ კაკაბაძის კრაკოვია - იაგელონიას, ბრატისლავას სლოვანი კი გურამ კაშიასთან ერთად, კოშიცეს მიიღებს.