პრემიერ ლიგა
პრემიერ ლიგის მეოთხე ტურის ცენტრალური შეხვედრა სწორედ დღეს გაიმართება, ლონდონური დერბი - ტოტენჰემი არსენალის წინააღმდეგ. სტუმრები ტიტულის მოგების ერთ-ერთ ფავორიტებად მოიაზრებიან, მაგრამ ლიდერ მანჩესტერ სიტისთან ჩამორჩენა ამ მომენტისთვის 5 ქულას შეადგენს. საჩემპიონო რბოლაში დარჩენისთვის "მეთოფეებს" მოგება სჭირდებათ.
ჰოტსპურსს აქვს სამი ქულით ნაკლები და ეს გუნდი პრემიერ ლიგის სატურნირო ცხრილის ათეულს ქვემოთ არის. რაც შეეხება ამ გუნდების ურთიერთმატჩების ისტორიას, 185 თამაში: 77-ჯერ მოიგეს "კანონირებმა", 58-ჯერ "დეზებმა", 50 შემთხვევაში კი ფრე დაფიქსირდა. აღნიშნული დაპირისპირების საუკეთესო გოლეადორი, 14 ბურთით, არის ჰარი კეინი, რომელმაც "სპურსი" გასულ სეზონში დატოვა.
შეგახსენებთ იმასაც, რომ ინგლისელი თავდამსხმელი ერთი წლის განმავლობაში ირიცხებოდა "მეზარბაზნეების" აკადემიაში, მოგვიანებით კი მის ცხოვრებაში უაით ჰართ ლეინი გამოჩნდა. აქვე დავამატებთ, ორივე გუნდი მატჩს საკადრო პრობლემებით ხვდება. ემირეითსის ბინადრებს არ ეყოლებათ დეკლან რაისი (დისკვალიფიკაცია) და ახალწვეული მიკელ მერინო (ტრავმა).
ასევე, საეჭვოა მარტინ ოდეგორის, გაბრიელ ჟეზუსისა და რიკარდო კალაფიორის თამაშიც. ანგე პოსტეკოგლუს განკარგულებაში კი რიშარლისონ დე ანდრადე არ იქნება. საეჭვოა დომინიკ სოლანკეს, ივს ბისუმასა და მიკი ვან დე ვენის თამაში.
ლონდონური დერბის გარდა, ნისლიან ალბიონზე ასევე ვულვერჰემპტონი-ნიუკასლის მატჩიც გაიმართება.
17:00 - ტოტენჰემი-არსენალი
19:30 - ვულვზი-ნიუკასლი
ლა ლიგა
ლა ლიგაში ორი ძალიან საინტერესო შეხვედრა გველოდება. პირველ რიგში, გამოსარჩევია მადრიდის ატლეტიკოსა და ვალენსიას დაპირისპირება. აღნიშნული მატჩი, შესაძლოა, შევრაცხოთ მეკარეების დუელად: იან ობლაკი გიორგი მამარდაშვილის წინააღმდეგ. როგორც გვახსოვს, გასული ზაფხულის დასაწყისში ქართველი კარის დარაჯის სახელს "ინდიელებს" უკავშირებდნენ.
ეს მოხდებოდა იმ შემთხვევაში, თუ "როხიბლანკოს" დატოვებდა მისი სლოვენიელი მეკარე, თუმცა როგორც ვხედავთ, ის დარჩა. ყველაფერი დასრულდა იმით, რომ "ღამურების" მეკარე ლივერპულში გადავიდა. ახალგაზრდა კარის დარაჯი პრემიერ ლიგის გრანდს შეუერთდება 2025 წელს, იქამდე კი ის იჯარით "ლოს ჩესში" დარჩება.
მეორე საინტერესო შეხვედრა გველოდება კატალონიურ დერბიში, ჟირონასა და ბარსელონას შორის. სტუმრებს ლა ლიგის მიმდინარე სეზონში ჯერჯერობით ერთი ქულაც არ დაუკარგავთ. ვნახოთ, რა იქნება "ბლანკივერმელსთან", გუნდთან, რომლისთვისაც მიმდინარე სეზონი ისტორიული მნიშვნელობის არის, რადგან პირველად ითამაშებს ლიგაზე.
16:00 - სელტა-ვალიადოლიდი
18:15 - ჟირონა-ბარსელონა
20:30 - ლას პალმასი-ბილბაო
23:00 - ატლეტიკო-ვალენსია
სერია ა
სერია ა-ს კვირის სათამაშო დღეს ჯენოასთან სტუმრობით გახსნის რომა, რომელსაც ამ დროისთვის ერთი გამარჯვებაც არ აქვს მოპოვებული. მოგვიანებით, საქმეში კალიარისთან სტუმრობით ნაპოლიც ჩაერთვება. სანაკრებო მატჩების შემდეგ, ხვიჩა კვარაცხელიას ჩაუტარდა სამედიცინო გამოკვლევა, ის მწყობრშია და "პარტენოპეის" განკარგულებაში იქნება.
მეოთხე ტურს დახურავს მილანის ინტერი, რომელიც აუტსაიდერ მონცას ესტუმრება. გასულ ტურში ბერგამოს ატალანტას განადგურების შემდეგ, "ნერაძური" კალჩოს ლიდერებში გაერია, გუშინ კი ქულები დაკარგა ტურინის იუვენტუსმა, რაც მოქმედი ჩემპიონებისთვის დამატებითი მოტივაცია იქნება.
14:30 - ჯენოა-რომა
17:00 - ატალანტა-ფიორენტინა
17:00 - ტორინო-ლეჩე
20:00 - კალიარი-ნაპოლი
22:45 - მონცა-ინტერი
ლიგა 1
ლიგა 1-ში დიდ ინტერესს იწვევს ლიონის სტუმრობა ლანსთან. გასულ ტურში ვიხილეთ ძალიან დასამახსოვრებელი შეხვედრა სტრასბურგის წინააღმდეგ, რომელიც ოლიმპიკმა 4:3 მოიგო. ეს ყველაფერი იმის გათვალისწინებით, რომ მატჩის მსვლელობისას მასპინძლები აგებდნენ 1:3-ს, მაგრამ 72-ე წუთისთვის უკვე 4:3 იყო.
სამწუხაროდ, რონელების ქამბექი გიორგი მიქაუტაძის მოედნიდან გასვლის შემდეგ დაიწყო. დღევანდელი დაპირისპირება გამორჩეულია იმით, რომ "წითელ-ოქროსფრები" აქტიურად ცდილობდნენ ქართველი ფორვარდის გადმობირებას, მაგრამ ყველაფერი დასრულდა იმით, რომ ახალგაზრდა შემტევმა "ლომები" აირჩია.
17:00 - რენი-მონპელიე
19:00 - ნანტი-რეიმსი
19:00 - ტულუზა-ლე ავრი
19:00 - სტრასბურგი-ანჟერი
22:45 - ლანსი-ლიონი
ლეგიონერები
კვარაცხელიას, მამარდაშვილისა და მიქაუტაძის გარდა, თავის შეხვედრებს სხვა ქართველი ლეგიონერებიც ჩაატარებენ. უკვე რამდენიმე საათში, საბა ლობჟანიძის ატლანტა ნეშვილს მიიღებს. თავის მატჩებს საბერძნეთში ლევან შენგელია და ლუკა გუგეშაშვილი ჩაატარებენ. ოთარ კიტეიშვილი შტურმ გრაცთან ერთად ვენის აუსტრიას ესტუმრება.
შეგახსენებთ, რომ ქართველი ნახევარმცველი ავსტრიის ბუნდესლიგის საუკეთესო ფეხბურთელის ჯილდოსთვის იბრძოლებს. ანზორ მექვაბიშვილის უნივერსიტატეა კრაიოვა ესტუმრება პოლი ლასის, კვიპროსში კი ერთმანეთს გიორგი ლორია და გიორგი ქვილითაია დაუპირისპირდებიან. ბოლოს კი ლა ლიგა 2, სადაც გიორგი წიტაიშვილის გრანადა ელჩეს სტუმრება.
ყველაზე გამორჩეული მატჩების განრიგი იხილეთ ქვემოთ:
03:30 - ატლანტა-ნეშვილი
14:30 - ჯენოა-რომა
17:00 - ტოტენჰემი-არსენალი
17:30 - პანსერაიკოსი-ლევადიაკოსი
18:15 - ჟირონა-ბარსელონა
19:00 - აუსტრია-შტურმი
19:15 - პოლი-კრაიოვა
20:00 - კალიარი-ნაპოლი
21:30 - ომონია-არის ლიმასოლი
21:30 - ოფი-არის თესალონიკი
22:45 - მონცა-ინტერი
22:45 - ლანსი-ლიონი
23:00 - ატლეტიკო-ვალენსია
23:00 - ელჩე-გრანადა
