შაბათის მატჩის დღეს გაიმართება არაერთი საინტერესო დაპირისპირება, მათ შორის ცენტრალური კი ჩელსის მანჩესტერ იუნაიტედთან სტუმრობა იქნება. საკმაოდ მაღალია იმის ალბათობა, რომ მორიგი წარუმატებლობის შემთხვევაში, "წითელი ეშმაკებისა" და რუბენ ამორიმის გზები გაიყოს.
მანჩესტერ იუნაიტედი - ჩელსი
ტრანსფერებით დატვირთული ზაფხულის მიუხედავად, მანჩესტერის მდგომარეობა მნიშვნელოვნად არ შეცვლილა. პრემიერ ლიგაში ჩატარებული 4 ტურის შემდეგ, იუნაიტედი 4 ქულით მე-14 პოზიციაზე არის. ცნობისთვის, ლიდერ ლივერპულთან ჩამორჩენა უკვე 8 ქულას შეადგენს.
ჩელსი იმყოფება უკეთეს მდგომარეობაში - რვა ქულა, მეხუთე ადგილი. ამის გარდა, დედაქალაქურ გუნდს ის ფაქტიც უმაგრებს ზურგს, რომ გასულ ზაფხულს ლონდონელები გახდნენ მსოფლიო ჩემპიონები, თანაც ფინალში პარის სენ-ჟერმენთან მოგებით. დიახ, იდეალურ ფორმაში არც "არისტოკრატები" არიან, მაგრამ მათ გარშემო კრიზისიდან გამოსვლის ნიშნებს ვხედავთ.
გასულ ზაფხულს სტემფორდ ბრიჯის ბინადრებმა ტრადიციულად არ დაიშურეს ფული ტრანსფერებზე და ახალ ფეხბურთელებს შორის ალეხანდრო გარნაჩოც აღმოჩნდა. ახალგაზრდა ვინგერი იქნება ყურადღების ცენტრში, რა თქმა უნდა, იმ შემთხვევაში, თუ ენცო მარესკა მას თავის გამოჩენის შანსს მისცემს.
იტალიელი მწვრთნელის პოსტს ჯერჯერობით არაფერი ემუქრება, რასაც ვერ ვიტყვით ამორიმზე, რომლისთვისაც ჩელსისთან მატჩი ოლდ ტრაფორდზე შესაძლოა ბოლო აღმოჩნდეს. პრესა უკვე საუბრობს პორტუგალიელი თავკაცის შემცვლელებზე და ერთ-ერთ რეალურ კანდიდატად გარეთ საუთგეიტი მოიაზრება.
შაბათის ყველა გამორჩეული მატჩი
| დრო | მატჩი | ტურნირი |
| 15:30 | ლივერპული - ევერტონი | პრემიერ ლიგა |
| 17:30 | ჰოფენჰაიმი - ბაიერნი | ბუნდესლიგა |
| 17:30 | ჰამბურგი - ჰაიდენჰაიმი | ბუნდესლიგა |
| 18:15 | რეალი - ესპანიოლი | ლა ლიგა |
| 20:00 | ვერონა - იუვენტუსი | სერია ა |
| 20:30 | მანჩესტერ იუნაიტედი - ჩელსი | პრემიერ ლიგა |
| 20:30 | ვილიარეალი - ოსასუნა | ლა ლიგა |
| 22:30 | ნიურნბერგი - ბოხუმი | ბუნდესლიგა 2 |
| 22:45 | უდინეზე - მილანი | სერია ა |
| 00:30 | ატლანტა - სან დიეგო | MLS |
