მატჩის დღე - მანჩესტერ სიტი მთავარი მწვრთნელის გარეშე დარჩენილ ჩელსის მიიღებს

კვირის ცენტრალური მატჩი - პირველი დიდი დუელი პრემიერ ლიგაში 2026 წელს: მანჩესტერ სიტი საკუთარ კედლებში ლონდონის ჩელსის მიიღებს. განვიხილოთ, თუ რას უნდა ველოდოთ აღნიშნული შეხვედრისგან.

მანჩესტერ სიტი V ჩელსი

ჩელსიმ 2026 წელი დაიწყო ხმაურიანად - მთავარი მწვრთნელის თანამდებობიდან ენცო მარესკა იქნა გათავისუფლებული. ჯერჯერობით უცნობია, თუ ვინ შეცვლის იტალიელ სპეციალისტს, ნომერ პირველ კანდიდატად განიხილება სტრასბურგის თავკაცი, ლაიამ როსენიორი. პრესაში ასევე ჩავი ერნანდესის გვარიც ფიგურირებს.

სანამ ლონდონურ გუნდში არ მივა ახალი მწვრთნელი, დროებითი დამრიგებლის ფუნქციას კალუმ მაკფარლანი შეასრულებს. დავუბრუნდეთ "არისტოკრატების" ექს-დამრიგებელს, რომლის გაშვების მიზეზი, ბრიტანული პრესის თანახმად, მხოლოდ 3-თამაშიანი მოუგებელი სერია არ ყოფილა.

ვრცელდება ინფორმაცია, რომ ჯერ კიდევ სტემფორდ ბრიჯზე მუშაობის პერიოდში, 45 წლის მწვრთნელი მოლაპარაკებებს აწარმოებდა მან სიტისთან, რომელიც მას სამომავლოდ პეპ გუარდიოლას შემცვლელად განიხილავს. ცხადია, ეს ყველაფერი ჭორის დონეზეა, დადასტურების გარეშე.

ვნახოთ, ახდება თუ არა ეს ვარაუდი ესპანელი მწვრთნელის მანჩესტერული გუნდიდან წასვლის შემდეგ. რაც შეეხება დღევანდელ მატჩს, "ქალაქელები" არიან მე-3 პოზიციაზე, 41 ქულით და ლიდერ ლონდონის არსენალს ამ მომენტისთვის 7 ქულით ჩამორჩებიან. ჩელსის, ისევე როგორც მანჩესტერ იუნაიტედს აქვს 30 ქულა და მე-5 ადგილს იკავებს.

რაც შეეხება უკანასკნელ მატჩებს, გუარდიოლას გუნდს ჰქონდა ზედიზედ რვამატჩიანი გამარჯვებათა სერია, რომელიც წინა ტურში სანდერლენდთან უგოლო ფრეთი დასრულდა. ლონდონელები მსგავსი მიღწევით ვერ დაიკვეხნიან: 2 მოგება, 3 წაგება და 4 ფრე ბოლო 9 შეხვედრაში.

ეს იქნება ამ გუნდების რიგით 174-ე მატჩი - იქამდე, 67-ჯერ იმარჯვეს "არისტოკრატებმა", 66-ჯერ - ეტიჰადის ბინადრებმა, 40 თამაში ფრედ დასრულდა. აღნიშნული დუელის საუკეთესო გოლეადორი არის სერხიო აგუერო, რომელმაც სტემფორდის ბინადრებს სიტის მაისურით 13 ბურთი შეუგდო.

საინტერესოა ისიც, რომ ჩელსი მანჩესტერულ გუნდს უკანასკნელი 11 მატჩის მანძილზე ვერ ამარცხებს. ბოლოს გამარჯვება დაფიქსირდა 2021 წლის მაისში, ევროპის მთავარი საკლუბო ტურნირის ფინალში. იმის შემდეგ, "ქალაქელებმა" იზეიმეს 9 მოგება, 2 შეხვედრა კი ფრედ დასრულდა.

კვირის მატჩის დღე