[მატჩის დღე] მანჩესტერი-ლივერპული ნიდერლანდურად და კვირის სხვა გამორჩეული მატჩები

შაბათ-კვირა საფეხბურთო მატჩების მხრივ, ტრადიციულად, დატვირთული იქნება. მიმოვიხილოთ ყველაზე საინტერესო და დამაინტრიგებელი შეხვედრები.

პრემიერ ლიგა

დღეს, საფეხბურთო სამყაროს ყურადღება მიმართული იქნება პრემიერ ლიგისკენ, სადაც ლივერპული ესტუმრება თავის ყველაზე დიდ და პრინციპულ მეტოქეს, მანჩესტერ იუნაიტედს. შეიძლება ითქვას, რომ ეს იქნება არნე სლოტის პირველი სერიოზული გამოცდა მერსისაიდული კლუბის დამრიგებლის რანგში.

ნიდერლანდელი მწვრთნელი თავის თანამემამულე ერიკ ტენ ჰაგს სამწვრთნელო კარიერის განმავლობაში ოთხჯერ დაპირისპირებია - პირველი ორი შეხვედრა მოიგო სწორედ მან, ალკმაარის დამრიგებლის რანგში, ბოლო ორი მატჩი კი ამსტერდამის აიაქსის ყოფილმა თავკაცმა. მათ უკანასკნელ თამაშში გადამწყვეტი ბურთი გაიტანა ანტონი დოს სანტოსმა, რომელიც დღეს ნიდერლანდელი დამრიგებლის განკარგულებაშია.

ზოგადად კი აღნიშნული გუნდების ურთიერთშეხვედრების ისტორია ასეთია - 69-ჯერ იმარჯვეს "წითელმა ეშმაკებმა", 54-ჯერ "სქაუზერებმა", 51-ჯერ კი ფრე დაფიქსირდა. ამ დაპირისპირების საუკეთესო გოლეადორი არის მო სალაჰი, რომელმაც "მანკუნიანელებს" საერთო ჯამში 14 ბურთი გაუტანა. დღეს, ეგვიპტელი ფორვარდი კვლავ ეცდება "ოცნებათა თეატრის" ბინადრების დამწუხრებას.

ტენ ჰაგის გუნდი შეხვედრას საკადრო პრობლემებით ხვდება - ლიუკ შოუ, ვიქტორ ლინდელოფი, მეისონ მაუნტი, რასმუს ჰოილუნდი და ლენი იორო. ენფილდელების მხრიდან მხოლოდ კურტის ჯონსის თამაშია საეჭვო.

დღეს ასევე, ლონდონურ დერბიში ჩელსი მიიღებს კრისტალ პალასს, ტოტენჰემი კი ნიუკასლს ესტუმრება.

ლა ლიგა

ლა ლიგაში ყველაზე საინტერესო შეხვედრა მადრიდში გაიმართება, სადაც რეალი ბეტისს მიიღებს. კილიან მბაპეს ესპანეთის ჩემპიონატში ჯერ კიდევ არ გაუტანია ბურთი, ზოგადად კი "სამეფო კლუბის" თამაშის ხარისხი ბევრ კითხვას იწვევს. ფრანგი ფორვარდის მშრალი სერიის გარდა, გასათვალისწინებელია ის ფაქტი, რომ "ბლანკოსი" ჯერჯერობით ვერ ახერხებს ტონი კროოსის წასვლით გამოწვეული სიცარიელის ამოვსებას.

სერია ა

სერია ა-ს მესამე ტურის ცენტრალურ შეხვედრაში ტურინის იუვენტუსი რომას მიიღებს. მასპინძლებმა სეზონი ძალიან კარგად დაიწყეს - ორიდან ორი მოგება, "ჯალოროსიმ" კი პირიქით, 1 წაგება და 1 ფრე. დღევანდელი მატჩი დანიელე დე როსისა და ტიაგო მოტას დუელი იქნება, დამწყები სპეციალისტები, რომლებიც წარსულში თანაგუნდელები იყვნენ.

ყოფილმა იტალიელმა ნახევარმცველებმა ნაკრებში გვერდიგვერდ 14 შეხვედრა ითამაშეს და 2012 წლის ევროპის ჩემპიონატის ფინალამდეც მივიდნენ. ამ გუნდების ურთიერთმატჩების ისტორიაში 95-ჯერ მოიგო "ბებერმა ქალბატონმა", 49-ჯერ "მგლებმა", 58-ჯერ კი ფრე დაფიქსირდა. პირველ 2 ტურში დაფიქსირებული შედეგის მიხედვით, "ბიანკონერი" უპირობო ფავორიტია.

ბუნდესლიგა

ბუნდესლიგაში თავის შეხვედრას ჩაატარებს მიუნხენის ბაიერნი, რომელიც ფრაიბურგს მიიღებს. შეგახსენებთ, რომ გუშინ დასრულდა ლევერკუზენის ბაიერის წაუგებელი სერია, რაც შესაძლოა "რეკორდმაისტერისთვის" დამატებითი სტიმულიც იყოს. აქვე დავამატებთ, გერმანიის ჩემპიონატის 1-ელ ტურში ბავარიელებმა ვოლფსბურგს მოუგეს.

ლიგა 1

ლიგა 1-ის მესამე ტურში თავისი შეხვედრები უკვე ჩაატარეს გიორგი მიქაუტაძემ და ზურიკო დავითაშვილმა. ლიონმა დრამატულ ბრძოლაში სტრასბურგთან გაიმარჯვა, ანგარიშით 4:3, სენტ-ეტიენი კი ბრესტთან განადგურდა ანგარიშით 0:4.

დღეს, საფრანგეთის ჩემპიონატის გამორჩეული მატჩებიდან შეგვიძლია დავასახელოთ პარის სენ-ჟერმენის სტუმრობა ლილთან.

ლეგიონერები

რაც შეეხებათ ლეგიონერებს, კარლსრუე ბრაინშვაიგის აინტრახტს ესტუმრება. ზაფხულის სატრანსფერო ფანჯრის უკანასკნელ დღეებში იწერებოდა ბუდუ ზივზივაძის შესაძლო წასვლის შესახებ, მაგრამ ის "ლურჯებში" დარჩა. გიორგი გოჩოლეიშვილის კოპენჰაგენი მიიღებს ბრონდბიუს, გურამ კაშიას ბრატისლავას სლოვანი კი - ჟილინას.

შესანიშნავ ფორმაში მყოფი გიორგი ჩაკვეტაძე და მისი უოტფორდი ესტუმრებიან შეფილდს, სანდრო ალთუნაშვილი და ვოლფსბერგერი კი - ლასკ-ს. საქართველოს ეროვნულ გუნდში დაბრუნებული ირაკლი აზაროვი დონეცკის შახტარის რიგებში ესტუმრება კრივბასს, ლაშა დვალის აპოელი შინ ეთნიკოსს მიიღებს. გამოსარჩევია გიორგი კვერნაძის ფროზინონეს მატჩი იუვე სტაბიასთან.

თამაშების სრული განრიგი შეგიძლიათ იხილოთ ქვემოთ.