[მატჩის დღე] მიქაუტაძე მონაკოს წინააღმდეგ, უილიამსის შეხვედრა ბარსელონასთან და შაბათის სხვა გამორჩეული თამაშები

მორიგი სათამაშო დღე ევროპის ლიგებში, არაერთი გამორჩეული შეხვედრით. განვიხილოთ მათ შორის ყველაზე საინტერესო მატჩები.

პრემიერ ლიგა

პრემიერ ლიგის მეორე ტური გაიხსნება მანჩესტერ იუნაიტედის სტუმრობით ბრაიტონთან, ცოტა ხნის შემდეგ კი მანჩესტერ სიტი იფსვიჩს მიიღებს. ასევე, გამოსარჩევია ტოტენჰემის სტუმრობა ევერტონთან, ტურის ცენტრალური მატჩი კი გაიმართება ბირმინგემში, სადაც ასტონ ვილა არსენალს მიიღებს.

ლა ლიგა

ლა ლიგაში ყველაზე საინტერესო აფიშა ბარსელონასა და ბილბაოს ატლეტიკის შეხვედრას აქვს. როგორც ვიცით, მასპინძლებმა ილქაი გიუნდოგანი გაუშვეს, მაგრამ მათ ჯერ კიდევ არ დაურეგისტრირებიათ დანი ოლმო. ბასკების მხრიდან ითამაშებს ნიკო უილიამსი, რომელმაც კატალონიაში გადასვლაზე უარი განაცხადა.

სერია ა

სერია ა-ში მილანი ესტუმრება პარმას, ინტერი კი ლეჩეს მიიღებს. როგორც გვახსოვს, პირველ ტურში "თანაქალაქელებმა" ქულები დაკარგეს. სკუდეტოს მოქმედმა მფლობელმა 95-ე წუთზე ჯენოასთან მოგების შანსი ხელიდან გაუშვა, "როსონერი" კი ტორინოსთან 89-ე წუთამდე აგებდა 0:2-ს, მაგრამ საბოლოოდ ყველაფერი ფრედ დასრულდა.

ბუნდესლიგა

გუშინ სტარტი აიღო ბუნდესლიგამაც, თანაც ძალიან დასამახსოვრებელი შეხვედრით. ლევერკუზენის ბაიერი მიუნხენგლადბახის ბორუსიას ანგარიშით 2:0-ს ამარცხებდა, მაგრამ მოგვიანებით, ტაბლოზე 2:2 დაფიქსირდა. მატჩის ბოლოს კი, მოქმედმა ჩემპიონმა ტრადიციულად გამარჯვების გოლი გაიტანა. დღეს გამოსარჩევია დორტმუნდის ბორუსიასა და ფრანკფურტის აინტრახტის მატჩი.

ლიგა 1

საინტერესო შეხვედრები გაიმართება ლიგა 1-შიც. გიორგი მიქაუტაძის ლიონი მიიღებს მონაკოს, ზურიკო დავითაშვილის სენტ-ეტიენი კი - ლე ავრს. როგორც გვახსოვს, ოლიმპიკის ფორვარდი ძალიან ახლოს იყო "მონეგასკებში" გადასვლასთან, მაგრამ ყველაფერი მშობლიურ კლუბში დაბრუნებით დასრულდა.

ლეგიონერები

მიქაუტაძისა და დავითაშვილის შესახებ უკვე ვისაუბრეთ. რაც შეეხებათ სხვებს, ირაკლი აზაროვი, დონეცკის შახტართან ერთად, ოლექსანდრიას ესტუმრება. შესანიშნავ ფორმაში მყოფი გიორგი ჩაკვეტაძე, უოტფორდთან ერთად, დერბი ქაუნთის მიიღებს. სეგუნდა დივიზიონში გიორგი წიტაიშვილის გრანადა ესტუმრება რასინდ დე ფეროლს, გიორგი ქოჩორაშვილის ლევანტე კი კადისს მიიღებს.

გიორგი კაკაბაძის კრაკოვია გორნიკს შეხვდება. საბერძნეთში თავიანთ ახალ გუნდებში შეხვედრებს ჩაატარებენ ლევან შენგელია და ლუკა გუგეშაშვილი - ოფი მიიღებს ატრომიტოსს, პანსერაიკოსი კი არისს. არ უნდა დავივიწყოთ შტურმ გრაციც და მის შემადგენლობაში მოთამაშე ოთარ კიტეიშვილი. ავსტრიის მოქმედი ჩემპიონი ალტახს მიიღებს.

საინტერესო შეხვედრები გაიმართება სერია ბ-შიც. ლუკა ლოჩოშვილის კრემონეზე მიიღებს კარარეზეს, გიორგი კვერნაძის ფროზინონე კი სპეციას ესტუმრება. რთული გამოცდა ელის ანზორ მექვაბიშვილის უნივერსიტატეა კრაიოვას, რომელიც ბუქარესტის დინამოს ესტუმრება. მატჩების სრული განრიგი შეგიძლიათ იხილოთ ქვემოთ.