კვირის მატჩის დღე პირველ რიგში გამორჩეული იქნება ბევრის აზრით პრემიერ ლიგის მთავარი ფავორიტების დუელით - ლივერპული ლონდონის არსენალის წინააღმდეგ. განვიხილოთ როგორც აღნიშნული შეხვედრა, ისე სხვებიც.
ლივერპული V არსენალი
ლივერპულმა ზაფხულის სატრანსფერო ფანჯარაში მოახდინა ნამდვილი ფურორი - ფლორიან ვირცი, უგო ეკიტიკე, ჯერემი ფრიმპონგი, მილოშ კერკეზი, ჯოვანი ლეონი და სხვები. არ უნდა დაგვავიწყდეს ისიც, რომ მერსისაიდში ვალენსიადან იჯარით გიორგი მამარდაშვილიც დაბრუნდა.
ზაფხულის სატრანსფერო ფანჯრის დახურვამდე "წითლებს" უდიდესი ალბათობით ალექსანდერ ისაკიც შეუერთდება. უსაქმოდ არც არსენალი ყოფილა: ვიქტორ გიოკერეში, მარტინ სუბიმენდი, ნონი მადუეკე, ებერეჩი ეზე და სხვები. როგორც ვხედავთ, ენფილდის ბინადრების მსგავსად, ფინანსები არც ლონდონელებმა დაიშურეს.
ორივე გუნდს ორიდან ორი გამარჯვება აქვს, არნე სლოტის გუნდმა დაამარცხა ნიუკასლ იუნაიტედი და ბორნმუთი, "მეთოფეებმა" კი მანჩესტერ იუნაიტედი და ლიდსი. ლივერპული მაინც მოიაზრება ამ შეხვედრის ფავორიტად იმის გათვალისწინებით, რომ მოქმედი ჩემპიონი შინ თამაშობს.
ცხადია, ეს არ იქნება შემაფერხებელი ფაქტორი მიკელ არტეტას გუნდისთვის, რომელსაც გულშემატკივრები ტიტულების მოგებას თხოვენ. ესპანელი დამრიგებელი ემირეიტსზე მუშაობს 2019 წლიდან, მაგრამ ერთი ასოციაციის თასისა და ორი ინგლისის სუპერ თასის გარდა, ჯერჯერობით მან ვერაფერი მოიგო.
ვნახოთ, იქნება თუ არა ეს სეზონი არსენალისთვის გარდამტეხი. საინტერესოა ისიც, რომ მერსისაიდელთა ლიდერი, მოჰამედ სალაჰი პრემიერ ლიგის მთავარ ფავორიტად სწორედ ლონდონურ კლუბს ასახელებს. დღეს, ეგვიპტელი ფორვარდი ამ გუნდის სიძლიერეს საკუთარ თავზე გამოცდის.
კვირის გამორჩეული მატჩები
| დრო | მატჩი | ტურნირი |
| 17:00 | ბრაიტონი - მან სიტი | პრემიერ ლიგა |
| 19:15 | პარიზი - მეცი | ლიგა 1 |
| 19:30 | ლივერპული - არსენალი | პრემიერ ლიგა |
| 20:30 | ჯენოა - იუვენტუსი | სერია ა |
| 22:45 | ინტერი - უდინეზე | სერია ა |
| 22:45 | ლიონი - მარსელი | ლიგა 1 |
| 23:30 | რაიო - ბარსელონა | ლა ლიგა |
